Tangatetba Alitsüla

~ T. Lima Tzuwar, Ungma, Impang, Artang Ward.

Akhümtsübua aliba Minister aser MLA tajungtem aser asen Nagaland nung aliba nütsüng nübur aser Khristan tajungtem, asen Nagaland ya Khristan state ta ajar masü no? Kechiba temenen tanüla nem yamai anishidaktsür. Kinungtsür mali aser kinungbor mali aika kümdaki, pei jala aser jabaso mali aika kümdaki ya Minister aser MLA D.C yimtak yimsüsür aser Town nung alir yimsüsürtemi kanga bilemdangtsü mapang lir. Police temia na yi jemnüdang mesüra sübokrem tera aginüdang gate atena yi belener yoker, mozü tamajung jenti bener yoker. Town aser yimtsüngtem lenmang aser nalla ajak nung yi bottle agi sünger nisungia gari lenmang mangu senzüteper. Gari lenmangbo yanglu saka gari lenmang mangu lemang tezülen o nükküm aser au agi yangluba atsü nung pei teka agi nüita nüita nemzür. Karbo lenmangbo lenmang nung saka menur tanem tanemi senzüba angur. Temeim tsürabur tajungtem tsungen-i pei techanu aniba ama ner jabaso aser jala aser ozü jabaso jalajia aseni yi jema aser mozü chia sayu nungji paria aji angazüker ati. Pei chir tim lenmng nung sayutettsü aser azüoktsü melen pei jabso aser jala asoshi per küma litetba kibongji tajung kümtima? Asen par sülen anitaka senzür masü parnok kechi achir aser kechi ajemerar memetet aser kechi inyaka aser benshia jajar memetet ati.
Anungji Khristan taküm ka ama aser Khristan kibong ka ama pei jabaso aser pei jalatem temi anitetba alitsüla naji ita sen merijang 30, 40, 50 tashia ngua alitsü akok, saka jabasoi meshiba aser jalai meshiba ajakbo magütsütsüla aser phone-a jabaso jala ajak ataabo malitsütsüla, kechiyong iba phone ajanga nisung jenti raksatsür. Temeim nütsüng nübur tajungtem aser Khristan tajungtem akidang libaliru aser tanü asüng libaliru y repranga aser asadanga aru nung alima temelenshi olura kümdaki. Nisunger arishi tatsüba akümer, tsüngküm mongpu aser mapang melenshir asü nung pei taküm kibong kanga junga melenshir pei tanüla kotaki aotsüsaTsüngrem akhüm tsübua ali mesüra tarutsü aliba anogotem küm nungji kechia taloktsüar memetet.
Temeim linük tenzüker tajungtem aser tema nung alir nütsüng nübur tajungtem shirnoki asen Naga lima meimer nenok anibelem arema kümsa küm asen Naga lima asoshi India Govt. den tejak o tejak na ajurutepa ken o tatem leni aruba asoshi tema nung alir aser linük tenzüker dang kanga pelaba lemsateper. India küboksa alitsü süaka wako balala aser temzüng tera balaka asoshi jembiyonga aor asünung kodang aji renemdir nenok ajak telongjem ka sür asen Naga lima melenshia yanglushitsü temulung ka sür Naga lima anitsü merangangma. Ya tema nung alir nütsüng nübur aser amangbapur nüktzü yima sarasademtsüba asen teyanglur Tsüngremi langzüba ajanga ta meteta Tsüngrem akhüm tsübua Pa tsüngsü nung jajadi.