Tangatetba balala süaka Nehru-i nüburtem atema inyakogo: Rajnath

New Delhi, November 14 (Agencies): Tanü Home Minister, Rajnath Singh-i linük nung mezüng Ato kilonser Jawaharlal Nehru nem akhüm agütsüba den külemi, tangatetba balala süaka pai (Nehru) nüburtem atema inyakba aser linük yangerba nung shilem tajung agiogo, ta ashi.
Nehru asoba anogomung 125 buba nüngtem nung sentong ka nung jembidang Rajnath-i, “Onük aika nung Nehru den onok tangatetba balala liasü. Pa mapatongtem nung tangatetba balala liasü. Ajisüaka pai linük nüburtem jenjang ajungtsü atema inyakba aser linük yangerba nungji onoki arendaka mebilemer,” ta ashi.
BJP lenir Singh-i, yimtenren tanüdangtsü (mirror) nung pai Nehru ji Congress nübo ka ama merepranger saka linük tanüdangtsü nung repranger, ta ashi.
Home Minister-isa, Nehru ama lenirtemi shilem tulu agiba ajanga tanübo India nung Parliament takang lir, bureaucracy aser independent judiciary tashi tait aser tetsübu maliba press lir, ta ashi.
“Nehru ama lenirtemi shilem tulu agiba ajanga India ya alima nung democracy tulutiba kümogo, tangbo India nung democracy takok anguba atema benjungteper,” ta taoba BJP National Tir, Rajnath-i ashi.
Singh-isa, Nehru nunger lenisüba nung linük nung Bhilai aser Rourkela nung industry tulu amenokogo, IITs, IIM aser nuclear plants rejutem amentetogo, ta ashi.
“Nehru-i industry nung temelung agüjaaka, linük atema tongtibangtibaji aluyimba lir ta pai meteta liasü. Pai ‘Ni industry atema lir aser ni steel plants atema lir, saka industry dang nungibo aluyimbaji kanga agia tongtibangba’ ta jembia liasü,” ta Home minister-i ashi.
“Nehru-i teti tanurtem atema shisaliok aser parnok anitettsü atema mera agi, kechiyong tanurtem nem shisaliok tajung agütsü nungdang India ya terenlok linük ka asütsü ta pai angateta liasü,” ta Singh-isa ashi.
Singh-i, par mapang nung Nehru ji lenir tajung rongnung ka liasü, aser pa leniba kübok Non Aligned Movement tenzük, ta ashi.
“Rongsenkettsüng, science aser technology nung Nehru indang mapatongtemji tenüngsang agütsütsü tetemsü,” ta paisa shisem.