Tangatetba melenshira, alima koktettsü: Alemtemshi Jamir

Kohima, July 09 (TYO): Honibarnü taoba Chief Secretary, Alemtemshi Jamir-i Naga lanurtem dang,  peisasa pei ilaa bilemba shisatsü indoktsüla aser Naga nungerji kin tila aser backward nisungtem ta tangatetba melenshitsüla, ta ashi.
Baptist High, Kohima nung ALS IAS Kohima Centre-i civil service tatidang agütsütsüpurtem atema ayongzükba “How to crack civil services exam” seminar nung jembidang Alemtemshi-i Naga nunger lanurtem dang, tanga limaji balaka aser asenok balaka ta mebilemtsüla, ta metetdaktsü.
“Asenoki asen tangatetba melenshira nai alima koktettsü,” ta pai lanurtem ayongzük.
Paisa ashiba agi, Naga nunger aiür-asangurtem shi aser tekolok nung kanga tepera, aser shisatsü tsütsülen tangar dang nungi balaka jenjang tajemba nung mali.
Paisa, tanübo Naga nunger aiür-asangurtemi tematiba jenjangjia tongtettsü, kechiyong tanübo alima ya tematsük kümogo. “Na Kohima nung liaka, mesüra Kiphire nung liaka, Pungro mesüra New York mesüra  Tokyo nung liaka lanur ajak atema maongkatemji kasa dang lir, aser ibaji technology aser digital revolution ajanga lir,” ta pai ashi.
“Item ama technology ajanga alima tesem ajaklen ner züngartemi reprangtetba dish TV aser TV channel kasaji nai reprangteter,” ta paisa ashi.
Whatsapp, facebook, social media apps tem aliba kasa mobile phone ji naia amshir. Ajaki kasa google amshiteter, ta pai ashi.
“Asenok alima tematsük ka nung alir, kong alima tesem mashii ka nungi nisung ka den kasa shisatsüji asenoki angur,” ta Alemtemshi-isa ashi.
Ibaji mapa bushiba talisa Civil Service tatidangtem  atema renemshiba nung tajungtiba asütsü, ta paisa shisem.
Nai takok angutsüji nü tangatetba aser mulungsentsü dak tongtibangsüa keta lir, ta paisa ashi.