Tangatetba tajung ali nung dang melenshitsü: Rio

Piphema, March 23 (TYO): Loktiliba nung temelenshi tajung bener arutsü atema tangatetba aser tebilemba tajung alitsüla ta Nagaland Chief Minister Neiphiu Rio-i ashi.
“Onoki Temelenshi bener arutsü nangzük saka temelenshiji nübortem indang tangatetba aser tebilemba nungi adoktsüla” ta pai ashi.
Angami Students’ Union (ASU) indang 28 buba biennial general conference nung jembidang Rio-i iba olen jembi.
“Sorkar melenogo saka nisung teimba ka kasa dang lir anungji nübortemi tamajung dang bilemer. Nübortemi tangatetba memelenshira aser temelenshi bener arutsü atema inyakba nung shilem magira, sorkari temelenshi bener arutsü ta asüba yimyimji metongtettsü aser pungmang ka dang asütsü” ta Chief Minister Rio-i ashi.
“Loktiliba nung temelenshi tajung bener arutsü ta alizüng yur asenok ajak longjem nung ang chichiba temelenshiji ataloktsü” ta paisa shisem.