Tangatetba tajung aliba BJP lenirji Rajnath Singh dang lir: Congress

New Delhi, November 13 (Agencies): BJP lenir aser Union Home minister, Rajnath Singh-i, party (BJP)-i lenir taintem tangatetbaji shisadangtsüla ta jembiba o pusema tanü Congress Party-i, tang tashi nung aliba party (BJP) nung tangatetba tajung aliba lenirji Rajnath dang lir, ta ashi.
“Rajnath-i jembiba oji khenyongi hau ta agizüker aser tang BJP nung tangatetba tajung aliba lenirji pa dang ama ni bilemer. Tanü BJP iba jenjang tashi yangertetertemji Advani aser MM Joshi nunger lir aser BJP dang lenmang sayutsü meranger. Ajissüka aibelen angatetdaktsütsü merangertem anema parnoki temerenshi agütsütsü meranger,” ta Congress lenir, Rashid Alvi-i ashi.
Osang ajanga angazükba agi Rajnath-i BJP nung lenir taintem- LK Advani, Murli Manohar Joshi, Yashwant Sinha aser Shanta Kumar nunger pusema, parnoki BJP ainba nung shilem tulu agiogo, ta jembiogo.
Taoba mapang party Tir ana- Advani aser MM Joshi na, taoba mapang Union minister, Yashwant Sinha aser taoba mapang Himachal Pradesh Chief Minister, Shanta Kumar nungeri külem sangdong ka ajanga, Bihar assembly election nung party-i tamakok anguba kuliji jungjunga bushisüngdangtsüla, ta metetdakja liasü.