Tangbo Hindu Right wing-i kiralongra inyaker: Kamal Haasan

Chennai (Tamil Nadu), November 02 (Agencies): Tamil film actor Kamal Haasan, yimtenren nung ajemokba mapang ka nung pai, Hindu right-wing teloktemi rara adokdaktsür, ta aitsü.
Pai hopta shia züluba ocet ajanga, “Tesüiba mapangtem nung Hindu right-wing teloktemi rara adokdaktsüba nung shilem magi liasü. Parnoki tanga teloktem den shisa lemsatepa liasü, ajisüaka tangbo parnoki rara adokdaktsür,” ta aitsü.
Kiralongra ken otem nung Hindu nungerbo maitsütsü ta jembiba o aija pai, “Hindu kiralongraba atema jembiba anema Right wing-i menokdaktettsü, kechiyong kiralongra agi parnok camp-a tongogo,” ta ashi.
Paisa, “Hindu nungeri joko ‘satyameva jayate’ nungi pilar aser ‘tashiyimji tim’ ta bilemer,” ta aitsü.
Kamal Haasan-i kobi melii pa indang yimtenren party ka tentettsü ta jembidar, ajisüaka iba mapangji kodang asütsüar mejangjar.
Tawa pai pa sapur aser pusemertem dang, pa asoba anogomong, November 7 nü sangdong tulu ka atema renema liang ta sangdong. Ajisüaka tesülen pai, iba anogo nungji pai pa meyong yimtenren party metentettsü, ta jangjashitsü.
Tawa Kamal-isa Chennai nung AAP tongti aser Delhi Chief minister, Arvind Kejriwal ajurua senden ka mena liasü, aser iba mapang nung Kejriwal-i pa dang yimtenren party nungji lanurtem anioktsü sayutsüngia liasü.
Kamal-isa Kerala Chief Minister, Pinarayi Vijayan ajuru, ajisüaka pai left mesüra right yimtenren party kecha nunga madentsü ta metetdaktsü.
Paisa pai “saffron” mesapaur, ta ashi, koba tetezü pai BJP mesüra RSS nung madentsü.