“Tangur kati tangar nem agütsütsüla” : P.B. Acharya

Deobarnü Lions Center Midland Dimapur nung Deepawali Mela tenzükba sentong nung Nagaland Angh, P.B. Acharya-i ‘Beti Bachao Beti Padao’ tenangzükba zünga metetdaktsüdang agiba noksa angur.

Dimapur, Octobor 23 (TYO): “Tangur kati tangar nem agütsütsüla aser magütsüra, paji auer ka ama lir” ta Nagaland Angh, P.B. Acharya-i tanü Lions Club Dimapur nem tenüngsang agüja jembidang ashi.
October 23, 2016 nü Lions Centre, Midland Dimapur nung Lions & Leo Deepawali Mela Sunday sentong lapoktsüdang Angh Acharya-i iba o jembi.
Lions Club Dimapur-i loktiliba asoshi mapa tajung aika inyaker aser takartemi loktiliba yariba ajanga dang India renloktsü, ta paisa shisem.
“India ya alima nung democracy tulutiba aser asen linük nung tamangbaren tsütsü telemsa mali. Asenok India nunger asüba atema nüma tanga bilemtsüla” ta Acharya-isa ashi.
Angh-isa tetsü oshi indang olen ka jembidang, “pei tetsü oshi amadokbaji pei sasa soseta asüba medem lir. Asen tetsü oshiji asen maitsü lir” ta metetdaktsü.
Shisaluyimba dak sendakba onük jembidang Nagaland Angh-i, “University tem nungi graduate asürtemji mapa bushirtem masü saka mapa agütsürtem asütsüla aser sorkari mapa meinyakdang, nija school temi school fee aika agiba ajemtsüla” ta ashi.
Paisa, Beti Bachao Beti Padhao tenangzükba azüng aser pa sülen telokia anidaka azüng. Bedi Bachao Beti Padhao atema Lions Club, Dimapur-i sen 50000 cheque ka agütsü.
Iba sentong nung Angh Acharya nema Lions Club nung honorary member kümdaktsü aser paisa Lions annual Peace poster contest nung takoker nem sempettem lema agütsü.
Deepawali Mela ya kümshia Lions Club ajanga ayongzüka amunger aser iba nung aruba senji parnoki loktiliba asoshi mapa balala inyaker.
Tanü agiba sentong nungsa Angh kinungtsü Kavita Acharya, Dimapur Deputy Commissioner of Police Dimapur, Lion o Leo züngsemtem den temeimertem aika aden.