Tanishir züa shimba tamashi

~ P.Renthy Jamir.

Alima nung Tsüngremi yangluba shiruru ozüsangno ajak parnok pei temang tashi agi onzüka taküm alir. Saka nisungbo O agi taküm alir. Meimchir asoshi tashi tulubaji O lir. O agi kokra takok O nung memetenra tamakok. Nisung tashi temetet ajak pai jembiba O nung dang sentaka lir. Shiruru tulutiba shiti nisungi kangla tua yutsür tepseter. Tesashiba keyi shikirang yanglur tepseter. Teti saksalema aliba ozü rongnung tekokaba omechi tepong koba angi aser sang nung meputeter tsüngdem soa yutsür apur. Saka nisungbo pa O nung pa apur. Yihuda nungeri Yisua pa O nung aputsü teti mita atam aser O nung tai tonglokja tepset.
Meimchir lokti balala tanishir oda America, India President nungi tenzüker Naga Hoho, NSF, Ao Senden, AKM, Tzukong President, NBCC General Secretery, ABAM Executive Secretary parnok ajak ta shidi, parnok yagi O khen kazüka yokbaji nübur asoshi tongtibang, ano parnok libalirojia nüburi nüksensa repranger. Tanü putu tensa ya kitsük mipener ama milepalepa ariteper. Kong tanishirtemji lazülakoa süwasüria alitsü mapangjagi matar. Ano tapi agi meshisadangi temong maka teptettsüok osang zülurtem den sensak masemtsüla. Kechiyong Pai jembiba nung pa aputsü (Victim of his own words).
India president Abdul Kalam, BJP aser Congress party ana senteper shim. Saka pai mezüng osangzülur den jembidang ‘Ni kü kuo yanglushitsü süra ni kü yimten yimsüsuba jenjang tali tabensaba yanglushidima?’ (I will reshape my hair, will I reshape my political accuman? Mezüngyongi tai ulura jembi (faux pas) (The very beginning proved wrong ) pa missiles scientist ka saka pai Pakistan O India na Nuclear weapon tashi asadanga (capibilities) jembiba ajanga Perves Musharraf-i India amokmerena Pakistan-i tama nuclear hadir amshia India amaktsü ta shijen ashi. England aser America-i Musharraf dang iba hadir amshia India nüna rarara Pakistan limabo ghonda ka ana tsüngda meshimeshia samatsü. India lima asoshi tesama tulu asütsü saka India bo akatsü ta ashiba agidang anen. Aji oda O nung melemzük metemsüba nisung temaba menden nung amentsü shimbaji tamashi tulu liasü. (Blunder has been committed by Choosing Wrongman for right job) President ka züa jembili metongshili ta asübaji lendong tulu lir. (Learning by error is too dangerous for a President).
Naga lima nunga NBCC General Secretary, Rev.V.K.Nuh-i 19-9-1994 nung professor I.Yanger ya Nagaland University Vice Chancellor asütsü kecha agia metemsü, ta ashi. Ano Nuh-isa 1-6-2002, S.C Jamir mapang K.Therei Congress party nungi aritokdang Chakhesang nungeri iba atema mokorai lira parnok lokti ajak maksü ta ashi. Saka Rio-i NPF nungi Therei aritokdangbo Rev-ba yagi ola madok. Tamanger tokolak Khristan lima ka nung NBCC aser ABAM Secretary ya balaka O nung tekümdang libaliro tasüngtet tesüngjem asütsüla. Roman Catholic Bishop Franco Mulakkal Punjab Jalandar nung tamanger tokolakba pai parnok kübok tenzüktsur (Nun) ka dak tashiyim agi 13 ben mapa tamajung inyakba lai yimjak nung metetdakja iba atema taisang Bishop nem tapet temerenshi agüjang ta parnok tetsurtemi (Nun) la pusema akanger. Saka Bishop-i ni Yisu tenüng nung azüngashir ni tai meinyak. Aser Arogoi (Church) pa pusema tetsürtemang aitsür. Pa nüng amshiba atema Yisuibo kechi bilema lir memetet. Tanü asen India lima, Naga lima, Ao lima arogotem yamala tia ka nung lir. Kechiyong tatem anogo nung yamala tesempatsü tokolakba temaba menden nung mena angutsü ta Daniel-i shinba Yisui lepshia ashiba angur. Meimchir shi agia alaker, ango agia alaker anungji Arogo aika Pastor/Pastorni agi Arogopur jungjunga lakteter pai/lai sodi memeshir ta yimtsüng aika nungi angashir. Aji teinyaker tanishiri metettsüla .
Greek nunger shisa takar Plato-ibo yimsüsürtem ya takotet tashitemetet mongin rogo (Philosopher) dang shimtsüla ta ashir. Kechiaser Naga Hoho President NSF Tir kaji Naga nunger telemsa adokdaktsür masütsüla. Pa lenisüba nungbo ozü kinbo madentsü na tangsa anenang ta shiaka manenba lenir masütsüla. Nüburi ni agi laktetogo ni anendi kü menden toktsüdi ta masüba lenirji shisa takar masü saka züa shimba lenir ta ajar. Ano Ao senden President AKM Tir aser Tzükong president tem ya Aor telongjem tzükongsanger telongjem raksadaktsür ka masü Aor sobaliba wazüka Aor lipok metentepa Ao yimli azüazüa meraketa bener oteter kaka asütsüla .
Ni meteter nisa tuluba ta bilemba shisatsü masü saka shisa talang Alima ya ni bilemba dang nungi kanga agi tuluba ta rajema jembitsüla. Sayutsungir kaket nung shisa makari O temloka jembir ta ashir. Pai jembiba O nung pa mashitsüla pai shisatetba nung tepuoker masutsüla (prisoner of his own wit and trapped in the web of words he creates)
Anungji lokti tanishir shimdang Saul chuba ama asojen tobur ajung repranga taka tait nübener kidong tuluba tzükong tuluba apia meshimtsüla. Ano Arogo tokolakbai aser lokti balala President temi aibelendang tai jembisemdang tai-a ta metetsümonga tebu tobou aso kin kidong aser tzükongsangeri azü nübener ama kümla kümshi mesüi akok tashi metongshiteptsüla. Ano aibelen sangia Yisu tenüng amer an kolak nung tzü mamung ama mamishi-i ni memeteti junger sür inyakdang aibelenogo ta tatok meshitsüla. Süra lokti dangi Tsüngrem terasaba atakatem marutsü aser nübur azükarutsü ta bilemer.