Tantsür tambur makümba putu

Tang India nung rongsen jenjang asadangba nung osang tamajung kaji tanur asoba jenjang kanga ajema akümer saka ano osang tajung kaji, nisung arishibo talangba litetter. Iba jagi linük nung nütsüng ajema akümba sayur saka ano külen arishi talangba litetba jagi tanü putu nisungtemi akhi putu nisungtem dang nungi arishi küm talangba mapa inyaktsüsa tashi itita liteter. Atangji, asenoki asenok lepertem nung asürtem tasoba aser tasüba anogotem longpak nung züngdangyonga odangra, asenoki metetba tantsür tamburtem shirnok asenoki kanga arishi langa lir asü ama bilem, parnok to teimbaka arishi küm neter majungdang asüba purtem asütsü. Ibaji par putu nung tanü ama temang merükmeju mali, chiyongtsü tajung achitsü memetet, anogo shia alu mapa tasak inyaker aser shilumanem agi atongdang taneptsü angudak mozü ki maka, senpak ka majung agi mozü süngjang ka alia achi nung ajungtsüba ser nung ajia malitet aser alitetaka talidak maka ta alima nung jangratema aliba anogobo züngdangteta dang lir, alima nungi pilaogo. Iba tensa tia denji tanü asenok tia medemdangra asenokbo alima lendongtsüdong tuluka arur oker moura kodanga masütsü amai bilemtsüsa alitsüba mapang ka nung asenok alir. Tang tashi nung nisungi nisung dak aketba azü aser tango dang meyanglutetter , ashi joko nisung temang nung aketba shilem ajak nisungtemi melentsütetter aser tashidak ajak aneptsütetter. Iba jagi joko nisungtemi nisung ya kodanga tantsür tambur makümtsü aser masütsüsa inyaktettsü atema shisatsü tasen bushi tenzükogo. Iba ama jangratemtsü putu ka nung asenok alir asünungji, temang amshir ashirtembo arishi küm tir tukur nunga gari anir aser süngben tzüdalen  senzüba angur aser küm roker neter taintema tereprangtsü nungbo küm semer-lir tain amai dang repranger. Iba ama putu ka nung nisung ka arishi küm 60 nung government mapa nung sodi agütsütsübaji tapayutsüka angur. Item purtemji temang anema alirtembo asangur amai dang mapa nungi anener. Atangji, nisung ka kodang küm 60 jungdir, pa mesüra laji joko senior citizen rongnung züngoker. Tetezü joko putu tejenba nung alirtem, pokmapokchi aser tantsür tamburtem. Iba tangatetba jagi parnok nem teyaria lenmang aisü nung agütsür. Ajisüaka, tanü asüng küm roker tain ka senior citizen-a ta senzütsübaji mazümazür amai küm roker ajungertemia bilemer aser tangaria mamanger. Iba ama nisungtem, putu ajungba agi, tantsür tambur makümba putu nung aliba agi, government mapa nung inyaktsüba kümsük dena apuloktsütsü government-i bilemdangba mapang lir. Atangji, asen lima nungbo asenok aika meteta aser memeteti tasoba küm tai züluokba purtem lir. Iba jagi Nagaland nungbo tanü asüng chirtem dak alaka tasoba küm aser anogo anana lir. Ka shitakba aser ka school certificate nung aliba küm aser anogo. Iba jagi küm 60 nung mapa nungi alurtema teimbaka küm roker dakbo tali inyaker külenang alur. Itemji tama jungjung metongshitsübaji asenok atemabo kanga tongtibang kümogo. Ano, külen tang tangbo asen lima nung tazünger ajak ya government mapa bushirtem dang lir, anungji lanurtem mapa angutsü mechi nung akok tashi governmenty mapa nung inyakba kümsük küm ya ishiba asünungang ajak tajangzük angutsü. Jungjanga bilemdangra, takoker aser shisatsü agi ayima alirtem atemabo government mapa inyakba ya kanga takoksa lir, kechiyong pei dak aketba sempet amshia kecha meinyaktettsüsa alena ayur. Iba jagi bushisadangertemi ashiba agi, government mapa nung inyakertemi pei dak aketba tashi aser sempet noklang nung shilem metsüa mamshitet alima nungi pilatsüsa akümer. Ajisüaka, tanübo government mapa nungi anener külenang ano aiür asangur kümshi ama kümer sadoksadoka pei jangraba mapa inyaktsü tenzüker. Idangjibo mapa tenzüktsü asoshia sen terabo alir aser shisatsü agi tonga inyaker, anungji pei asoshi dang masü saka alima nem tajangzük agütsür. Ibajiang, ano government mapa inyakba dang nungi jangratatemba aser temoatsüba asütsü. Taküm nung tashi itta aliba piyong government tenzükbaji, shitakba asadangdi süra, ajak atema takoksa lir.