Tantsür-tamburtem

October ita ya alima ajunga nung taintem anogo monga tenzüker asünungji, iba ita yabo tsüraburtem o chirnurtem na aser lanurtem o taintem na tsüngda temeimtep akangshitepba ita amai bilemer. Atangji, iba ” International Day of Older Persons ” anogo ya taintem anogo ta masü saka tantsür-tambur anogo ta asünungang ano süoki taiba ia bilema amongtsüa akok, kechiyong taintem ta süra kibong kümerbo ajak amai bilemer. Iba anogo amongtsüba ya 1990 küm December 14 nü United Nations senden nung latet aser iba anogo nungi tenzüka alima ajunga nung tantsür tamburtem nem akümtsübu agüja parnok dang meima benshitsü indang jembia amonger. Atangji, tantsür tamburtem dang meima benshitsübaji dang masü saka anogo shia parnokji peladakja ajungshitsü aser akok tashi lokti nung shilem agidaktsütsü merangtsübaji lanurtem mapa asütsüla. Tantsür tambur maliba limaji aküm maket aser senpong-jangpong tazüng amai lir, kechiyong alima nung rongsen tulutibaji tashitemetet aser kechisarina maparen aika ajangshia metetba tantsür-tamburtem dak aketba shisatsüji lir. Iba tajangjem shisatsü aser tashitemetetji tantsür tamburtem dak lir. Iba rongsenjiang shitakba lanurtem asoshi alima senmang asünungji lanurtemi tantsür tamburtem dang nungi item shisatsüji angazüktsü merangtsübaji kanga tongtibang mapa ka asütsü. Kakerreju nung kaketshisatsü azüngba aser bushiba agia tashitemetet akümer, ajisüaka taintem dang nungi angazükba shisatsüjibo kaket nung zülua akaba  shisatsü dang nungi tuluba aser sentiba asütsü. Atangji, pei tsüraburtem süaka tantsür tambur dang meima benshitsübaji tasak saka parnok dang meimtsübaji angati meimtsüba masü asenok sentsü lir, kechiyong parnoki asenok mesütet. Aji oda, asenok tanur asüdang tsüraburtemi asenok mesütsü aser parnok tantsür tambur kümer külen asenoki parnok mesütsü ta longpet longa nisunger sobaliba aoer. Ibaji mangatetter atema kanga takoksa asütsü. Atangji, taintem akümtsübutsü aser tantsür tamburtem meima anepalutsübaji asenok pei tsüraburtem kija dang meimtsüba ashir masü saka tantsür tambur ajak dang kasasa meima anepalutsü indang ashir. Aji oda, ochi o kaji kenübo nisung ajak tantsür tambur akümtsü, anungji asenoki asen tsüraburtem dang meima anepalu mesüra asenok chirnurtemia asenok dang memeimtsü. Asenok aika dak tashimait ka alibaji asenok tain kümerbo asenoki tsüraburtem sendoker. Ano, talisa asenok kibong kümer pei kinungbo mechi mesüra pei kinungtsü mechi pei tsüraburtem agi pi kümer alir. Ibaji kangasa shisa makaba mapa ka asütsü. Asenoki asen tsüraburtem memeimba aser anepalu masüba jagi parnok timtema yutsüba tia dang nungibo tangari asenok menüja reprangba tiajisa tamajungba lir. Aji oda, asenoki asen tsürabur akümtsübua mamshiba agi tangar tsüngdang parnok aküm masü saka asen aküm samar. Ibaji meteta asenoki asen sentsü ka ama bilema asen tsüraburtem dang masü saka asen meketa aliba tantsür tamburtem dang akümtsübu sayua meima benshitsüla. Aji oda, asenoki kodangsa tantsür tambur ngudir, idangji asenoka kenübo parnok ama akümtsü ta bilema parnok akümtsübudi. Atangji, tantsür tambur küma alibaji taküm nung takok tuluka ta züngshia asenoki parnok nüng sanga jembidi aser parnok peladakja akok tashi kidang aser lokti nung mesüra arogo nung shilem agidaktsüdi.