Tanü 16 buba NSF Martyrs’ Memorial Trophy final asayatsü

Dimapur, October 14 (TYO): Defending champions, Barack Football Club, Peren aser tan asayamong nung mezüngsüa shilem agiba telok, Khulioh King, Tuensang na tsüngda 16 buba NSF Martyrs’ Memorial Trophy final asüng, Brehostibar nikongtsütsü 1:00 ako nungi tenzüka asayatsü.
“NSF final asaya nung Nagaland Parliamentary Secretary, Planning & Coordination & Evaluation, Neiba Kronu tongti tesemdanger aser Lajong FC Shillong nung Managing Director, Larcsing M Sawyan tetushi tesemdanger alitsü,” ta asayamong Organising Committee Convenor, Vipopal Kintso-i tanü sangdong ka ajanga metetdaktsü.
Final asayatsü jenjang anguba jakdang Barack teloki Boyz United goal 6-0 agi 1 buba round nung akok; Sechü-Zubza Youth Organisation telok madak goal 5-0 agi 2 buba round akok; goal 1 agi Country Boys telok pre-quarters nung tsükdaktsü; goal 5-0 agi Laü Youth & Students’ Organisation, Manipur quarterfinal asaya nung akok aser Senapati FC Manipur telok madak goal 2-0 agi semifinal nung takok ngua liasü.
Tan asayamong tenzüker tanü tashi nung par telok nem goal ka danga magütsüdaki Barack teloki kanga junga shilem agia lir.
Ano, Khulioh telokia 1 buba round nung goal 7-1 agi Katakhrie telok akok, 10th NAP (IR) XI telok madak goal 6-0 agi 2 buba round akok, prequarterfinal aser quarterfinal na nung The Tribal FC Kohima aser Alianza FC Dimapur telok na goal 1 agi tsükdaktsü aser goal 5-0 agi Pro-Streax United Dimapur telok semifinal nung tsükdakja final asayatsü jenjang angu.
Ano, par asayar, Nungsang Ao-i goal 10 tashi agüja tan asayamong nung goal timba agütsür asayar tanabuba kümogo.