Tanü ACAUT teloki lokti senden ayonger

Dimapur, September 11 (TYO) : Naga nunger lokti tentettem kari nokdangtsü merangaka, Against Corruption and Unabated Taxation (ACAUT) Nagaland teloki Naga yimten indang jembitsü ayongzükba ama, tanü Honibar nikongdang 3:00 ako nungi tenzüka Dimapur District Sports Council pur stadium (Public ground) nung akatsü ta metetdaktsüogo.
Tanü Hokolbar nikongdang, yangi Anaki Dimapur nung osangbenertem den jembidang, Khekiye K Sema, IAS (Retd)-i tang ACAUT teloki jakzükba senden ya shisatsü asüngdangteptsüba masü saka tebilemba lemsateptsü saka pangzüngbo kecha mazüngtsü ta jangjashitsü.
Iba lokti senden nung lokti aser arogo lenirtem tongtibang nisung aika arua shisalemsateptsü terenemba lir. Parnok rongnung nüngtugu o jembirtemji Niketu Iralu, peace activist, Dr Tuisem Shishak, Emeritus, Principal, Patkai Christian College, Dr. VK Nuh, general secretary Fellowship of Naga Baptist Associations & founder member of FNR, Dr. Visier Sanyu Meyasetsu, president Overseas Nagas Association, Church body- NBCC, Dr. Mazie Nakhro, Director,Mission Facilitator, USA aser Khekiye K Sema, IAS (Retd) nungertem alitsü.
Iba lokti senden ya malitsü asoshi karibo ACAUT purtem tsübudakja amokmerenogo saka iba senden ya alitsü lemtetogo.
Nisung kari ACAUT teloki parnok teinyaktsü alema inyaker ta jembia alitsüa akok, saka onok shinga dena meputepi mali aser onoki tang tejembidak Naga yimten onük nung nübortemi angashia shilem agidaktsünüba agi iba ama sensaksem senden ya jazüker ta paisa ashi.