Tanü Akhilesh aser Rahul nati nüboyim tenzüktsü

Lucknow, January 28 (Agencies): Uttar Pradesh Assembly election atema Deobarnü Lucknow nung Uttar Pradesh Chief Minister aser Samajwadi Party Tir, Akhilesh Yadav o Congress tatong Tir, Rahul Gandhi nati senteper state nung nüboyim tenzüktsü.
Congress aser SP na loktepba sülen tang mezüng Akhilesh o Rahul Gandhi na longjemer inyaktsü. SP-Congress teloktepi assembly menden 403 nungi menden 300 dak tema nung takok nagutsü rangloker inyaker.
Asüng nikongdang Lucknow nung lenir ana jagi osangbenertem senden nung külemi jembitsü, aser ibaji ajanga peipei party züngsemtem dang masü saka nübur ajak dang osang metetdaktsütsü aser party ana longjemer telemsa adokdaktsüba party tem tamakok ngudaktsütsü atema longjemba metetdaktsütsü, ta osang ka ajanga ashi.
Osangbenertem den jembiba sülen lenir anati road show nung külemi shilem agitsü. Iba sentongji Hazratganj nung aliba Gandhi Statue nungi tenzüktsü.
Congress aser SP na menden lemsatsü atema mapang talangka jembia aruba sülen SP-i tesüsa Congress nem menden 105 agütsü. Ajisüaka Amethi aser Rae Bareli nung menden kar atemabo party ana tsüngda tangatettep kati marur.
Congress aser SP loktepbaji takok teloktep ka lir ta shia Akhilesh-i, “Cycle (SP temaitsü) kija liasü, saka tangbo tekapu (Congress temaitsü) teyari ajanga (cycle) tekaraba kümogo,” ta ashi.
“Cycle nung teka tetezü menden 300 dak tema,” ta paisa ashi.