Tanü Angami lushi ghonda 8 mokdanger

Kohima, Jan. 06 (TYO) : Nagaland nung Municipal aser town council election agitsüba dak aketba maparen nung lendong timtem ataloktsüa kecha meteta malinung, itemji nokdangtsü mechi Honibar anepdang 7:00 ako nungi nikongdang 3:30 ako tashi Angami nunger lushi kübok aliba Kohima, Medziphema aser Chumukedima nung nisung shinga mesenzüdaktsüi mokdangtsü ta Angami Youth Organization-i metetdaktsüogo.
Honibar ya municipal aser town council election nung toktepnertem asoshi tenüng agütsütsüba tesüsaba anogo lir, anungji iba anogo nung tensa tia tamajung mataloktsü asoshi iba mokdangba sentong ya ayongzüker ta AYO tir Wb. Neinguvoto Krose-i metetdaktsü.
Angami Public Organisation (APO) teloki Angami nunger shibasa tan agitsü sangdonga aliba municipal aser town council election nung aitsü tenüng agütsüdir, pa mesüra lajibo kin nungi jendoktsü ta lateta aliba pangzüng nung AYO-ia nungiter ta parnokia nenshia metetdaktsü.
Tanga district nung nisung kari nomination paper agüja liaka, Kohima, Medziphema aser Chumukedima nungbo nisung shinga nema nomination paper agütsütsü memelatsü ta AYO-isa metetdaktsü.
Honibar anepdang nungi nikongtsütsü tashi agüja aliba mapang aser tesemtem nungi gari aser nisung shinga senzütsü memelatsü saka manemtsünemer, sepaitem, osangbenertem aser administration purtembo senzütsü melatsü ta parnokisa metetdaktsü.
Iba sentong nung shilem agir lanurtem ajak pei sobaliba süoshi agitsüla ta AYO sangdong ajangasa metetdaktsüogo.
Iba ama nisungtem nem timtem agütsüba atema sasar, ajisüaka nübortemi timtem arema tashi angadaktsüner ta parnokisa mepishia metetdaktsü.