Tanü Ao Arogotem nung toklang tenzüker tia balala

– Temsu Ao, Mokokchung.

Alima anogo shia melenshia aoba putu ka nung anogo shia shishilembaba ajak nung jenjang atuba tensa ka nung asenok alir,iba dak ajemdaker, talisa, ni Ao Arogotem nung toklang tenzükertem arogoi parnok itasen agütsüba nung ya Arogoi ken meyiba reprangshitsüla ta tangatetba kar lemsateper. Ajisüaka, ni shinüba nung ya Town Arogotem Kohima, Dimapur, Mokokchung ama ano tanga tangatetba arogotem asoshi mashir ta tama angatetdi. Reprangdangra, arogo aika nung toklang tenzüker ita sen yanglushitsü küm 10 nungang ken reprangshitsü ta arogo guide line nung renemer küm terji matong tashi kecha reprangshirang mesüi odang toktsür. Govt-mapa nung inyakertembo pay commission maruba mapang küm nung anabenbosa market jenjang atuba shia DA agüja küm nung ita sen anabenbosa tuloktsür, iba den pay revise masüba tetsüngda nung interim relief agütsür, saka arogotem kar nungbo Pastor nungi shir pa kübok tenzüker ajak deacon board-ia kecha reprangshirang mesüi odang toktsüba arogotem aika lir. Tanü putu nung anogo nung Tsüngrem tenzüktsü nübo bushidangbo degree tuluba azüngertem dang bushiteper, saka parnok ita senji reprangdangra govt. mapa nung inyaker 4th grade ka ita sena memenep. Oda ita sen agi meperir asünung, ak danga metsüdi ta asünunga, kodasür pastor tenzüker kati ak metsür ta tenük yoker, shishilembaba kar inyakti asünunga nüngsen jembitsür, kinungbo kinungtsü repa mapa inyakdaktsütsü asoshi arogo kar nungbo pongmang. Asenoki teti Tsüngrem tenzükertem asoshi bangpet süa jembiba O kaji (Tsüngrem tenzüker asoshiji ai, asu tatutsü dang lirgo ta jembir) iba ya tangar masü, saka ai asuji arogo nung asenok nüburtem ya lir.
Ano asenoki Tsüngrem tenzükertem dang parnok timtema angudang ariabilem O ka ashibaji, (koda asütsü tu! nenoki mezüngyongi timtem arema Tsüngrem tenzüktsü nangzüker Theology azüngji tu) ta zübazüba dang toktsür, aser arogo aika nung toklang tenzükertem timtem tulu agia Tsüngrem tenzüker, saka arogoi par kibong peria ita sen magütsüteterji tsürabur aikati pei chir kibong timtema aliba shishia bilemerji tsüraburi yaritsüsa akümer. Ibaji arogotem asoshi Tsüngrem tsüngdang sentsü tulu lir. Ano asenoki ya bilemdi asenok kidang ita nung shini mamatsü kg 2 agi peritsü akok, saka parnok tenzüker kidangbo kg 4,5 tashi jema alitsü südi kechiaser parnok kidangi meteta aliba aser memeteti aliba nisungtem agi teti parnokbo meneper ta angatetdi. Ano item dak alaka pastortembo memetetba nisung ajak pastor kidang anilokja toktsütsü aser karbo anogo ana asem tashi kidang mesürang ano taoi gari bus bara dena agütsür yoktsüsa aiben ajurur. Arogotemi ya jungjunga shisadangang, toklang tenzükertema asenok ama tanur kasa school tajung nung tangar agütsüba fees agütsütsüsa akümer, kaket, uniform nüngdak ajak abensaa agütsütsüsa akümer, iba den lokti balala sarusaji ajak nung atentsüsa akümer,dokan nunga kasaji dang meshitsü, ano kibong nung manem toushia ajirur. Shir arogoisa küm 10 nungang toklang tenzüker ita sen yanglushitsü ta asüba yabo ken meyiba reprangshitsü nüngdaker, aser iba inyakyim lemtet yabo Nashi ka süngzü meter 4,5 agi sendaker anepdang nungi nükong tashi tesem ka nung dang sendaker ayuba metem tebok masüng rokongseta toktsür. Talisa arogo nung toklang tenzüker den mapang ajak nung amaaliteba alibaji arogo nung deacon board tem ya lir, anungji akok tashi nenok tenzükertemi tensa aser mapang den apet parnokji meima anepalutsü tim, aser toklang tenzükertema arogoi na ita sen talang agütsür nai Tsüngrem aser nüburtem temulung achitsüsa minyaktetra, ibajibo Tsüngrem tsüngdang nü khuret lir, arogotemia ita senbo tebok sünga magütsüteter saka mapa mapa nungji dang reprangra ajia masü. Anungji Laishiba nung zülua aliba ama mojok anetba Nashi tepang menempangtsüli, saka timsüa benshiba nung arogo asoshi Tsüngrem nungi temoatsü talubusa ngua taküm aliba arogo ka asütsü merangdi ta ariabilem lemsateber. Tsüngremi arogotem ajak moajanma.