Tanü Arunachal nung taoba CM Pul asüpila sentong agitsü

Itanagar, August 10 (Agencies): Bodhbarnü Arunachal Pradesh yimtiba, Itanagar nung taoba state Chief Minister asür, Kalikho Pul nem akhüm tetushi tulu agütsüogo.
Brihostibarnü Pul den tatembangbuba asüpila sentong par constituency, Hayuliang nung agitsü. Mongolbarnü Chief minister official kidang pa takdang nung tsüngbang nungi alenseta sür liasü.
State sorkari anogo asemnü pa mangyimtsü aser Brihostibarnü sodi anogo asütsü sangdongogo.  Tamalen pa Arunachal Pradesh cabinet nung finance minister, power minister aser tribal affairs minister inyaka liasü.
China den arrtsülen aliba Anjaw district nungi Kalikho Pul ya yimtenren nung mapang talangka aliba sülen state chief minister 8buba aküm, ajisüaka ibaji khenpiga atema dang liasü.
Arunachal Pradesh nung Chief minister mapang tatsütiba inyaksangji Pul asütsü.
Yaküm nungi tenzüka ita ana tashi state yimtenren nung makmakshimak aliba sülen taküm February 19 nü pa chief minister aküm, ajisüaka taoba ita Supreme Court-i sorkar agiena Congress nem tashi meyipa agütsüba sülen pa CM menden nungi alu.

Kalikho Pul asüba bushisüngdangtsü BJP-i akhanger
Ano külen Bodhbarnü BJP-i, Kalikho Pul asüba kuliji temaba jenjang nung luden kati bushisüngdangtsüla, kechiyong nüburtemi ochiji metetner, ta takhangba agütsüogo.
Tanü BJP National Secretary, Shrikant Sharma-i, “Pul ji tetsübu maket lenir ka liasü. Pa iba yimya nung asüba ya kanga tia maka tatalokba ka lir aser bushisüngdangtsü nüngdaker. BJP-i iba ya temaba jenjang nung jurila luden kati bushisüngdangtsü akhanger. Pa asüba kuliji nüburtemi metetner,” ta ashi.
Pul ya taküm February 19 nü nungi July 13 tashi Arunachal Chief Minister inyaka liasü.