Tanü asen india lima nung tatalokba aser tarutsü tebilemtsü kar

~  Zulu Longkumer.

Tanü asen India lima nung koba yimsüsüba menden nung tensa tulu ataloka aoer iba ya asenoki meyimlaba maparen ajungben asenok dangi donga aruogo anungji item ya asenoki taroki yia shisadangti. Taoba lok sabha election agitsü mapang tashir aikati BJP ji power-i marutsü ta shia liasü, ano aikati power-i arutsü saka tamalen ama tashi tulubo mesutetsü ta bilema aser takzüa liasü saka meyimlaba tashi tuluba nung dang aruogo aser yangi temoatsü asü timtem asütsü asenoki memetet, govt form sür ita ishika tsüngta nung maparen aika ataloka aruer, saka yangi asenoki tongtibang mapa ana reprangdangti.
Mezüngbuba nung asenoki koba muslim nunger marriage law nung triple talaq parliament-i agientsüogo iba ya shisadangti. Iba yimsü ya ajanga muslim nunger teburtem nem tashi olura agütsür, kinungbo kati kodang kinungtsü ka maginür pai TALAQ (talaq tetezu= divorce) ta kinungtsü dang asemben shira ken O kecha maka yangji bala-a toker aser tetsürlai kecha ashishitsü makok akümer, iba ya ajanga kibong aika lusar aser tanurtem tia tamajungbai yia akoksar. Iba yimsü yagi tetsurtem kecha jenjang makai alar amai amshir. Muslim nunger ajakibo iba ya mepenshir saka telok kar, talisa India nung Hanafi sunni muslim teloki amshir aser iba yimsü agi bener arutsüba timtem aika ajiteta muslim telok aikati aser tashirtem aikati aitsür saka India nung iba ya menokdangteti lia aru. Muslim yimsü tenzükdak Saudi Arabia, aser Morocco, Pakistan, Bangladesh tensema linük 23 tashi nung iba yimsü ya tamalen nungi anendaktsür liasü saka India nung iba ya talangka atsütepa aruogo. Taküm dang parliament nung agizüker tatem nung President Ram Nath Govind-i August 1st nü agizuka temzüng kümogo. Iba ya ajanga India nung aliba muslimtsür ajak nem nüchiso agütsür anungji asenoki BJP-i aniba NDA govt dang pelati aser tenüngsang agütsüdi kechiyong parnoki mapa tajung tuluka inyakogo. Kusa mapa tajungji maneni inyaka ao nungbo koda tajung asütsü.
Tanabuba nung asenoki dang Jammu aser Kashmir nung atalokba tatsü agi reprangdangti, Jammu aser Kashmir ya alinük tulu, area 222,236 sq km (Nagaland area=16,579sqkm dang lir) aser population 2011 census ajanga ashiba agi 12,541,302 shi lir. Yangi muslim nunger 68% dak tema, hindu nunger 28% aser tanüngba ji Buddhist, sikh etc lir. India mainland nung muslim nunger majority aliba stateji Jammu aser Kashmir dang lir, iba denbo asetkong tila ka Lakshadweep dang lir. Jammu & Kashmir nepurtem ya kanga dang tashi temetet , temulongtetba tulu aser tasu tait, India lima British nunger dang nungi independent ngua aser India rangpen tuluka alibaji ana (India aser Pakistan) küma lemdang dang Kashmir ya koba nung atentsü ta rataa liasü. Iba mapang tashi India nung British nungertemi India nunger chubatem tashi ajakbo magien-e parnok küpok yimsü südakja liasü anungji Kashmir chuba jagi par limaji India den linü, kechiba süra paji Hindu nunger liasü. Saka par nepurtem teyimba muslim nunger liasü aser parnoki Pakistan den linü, iba ama tatsütep tia nung alidang Pakistan-i kashmirji amak aser alinük tulu ka atsüngatok, aji ajanga Kashmir chuba jagi India teyari meshi aser tangatettep yur India den aten aser iba rara ya UNO ajanga dang anendaktsü. Iba sulen article 370 renema agizüka ayu saka aji agi tatembang kati maru-e tanü tashi atsütepa arur. 1947 nungi tenzüka 1965, 1971 BANGLADESH war nunga amsema aser 1999 nung KARGIL war tashi nung INDIA aser PAKISTAN pezü ben tashi iba atema rara-a aruogo, tetsüngta nung border nungbo anogo shia amai rara-a sepoy jenti süa arutar, sürabang iba ama tia ka nung koba INDIA-i article 370 agienogo iba yagi kechi tia ka bener arutsütsü asenoki memetet saka tetsübutsü ka amai nibo bilemer, kechiyong item nepur ama tasütait temulongtetba tulu aser tashi tulu kin kati ajem alua malitsü, joko yimtitem tesem tesem nung public-i lenmang nung barricade yanglur security forces telungi maitdaktsütsü tenzükogo, ajungben milak tila ka agi tulu kema jangrutsü kanga anasa lir anungji ajaki kümdangdar saka aji agi talangkabo maotsü südi. India-i aibelen kaji iba article 370 ya agienba agi kashmiri separatist dang tali jashidaktsü masü saka tema nung India den tensema alir political leaders tem, Ex chief ministers Farooq Abdulla, par jabaso Omar Abdulla, Mehbooba mufti parnok ajak house arrest nung ayu aser iba ya ajanga nepurtem ajak jashidaktsür. Yangi India-i Jammu aser Kashmir nepurten tezüngzüktepba nepurtem den tangatettep makai aser masüngdangi raksar anungji iba ya teyim masü aser tashiyim amshiba ta aikati aitsür saka aji atema shingai-a India dak action agitsü makok aser lenmang mali kechiba süra ya India yimten telongtet küpok atalokba dang lir. India-i Jammu & Kashmir ama state tulu, tashi tait aser artsü nung aliba state ka dak iba ama tashiyim agi inyaktetra, asen Nagalima ama state tila aser tashi mait ka dang tashiyim inyaktsü tsübua litima? Asenok kanga tashi mait aser telongjem mali aser temulongtetba aser tangatetba ajema kümogo anungji asenoki tashi itta menokdaktettsü.
Asen Governor tasenbai aser yimsüsür aikati Nagaland nung Article 371 A ji magientsü ta ashir aser aji oda shidak asübo koda tajung süla saka ajak ya politics dang asünung aseni tamang makar, aser aji oda tsübua bilemba ama atalok nunga asenok kechi tia-i aitsü? India-i  sepoy yoktsü menüngdaktsü saka shishilembar aser ayangertem dang free süa asen Naga limai aitdaktsütsü aser mapang tatsü ka tsüngda asen lima tekong tenem ajunga sünga bendangertem aittsü aser parnok kodang telok tulu kümdir parnoki asenok metsübutsü aser asen li tena parnoki rakzüka aotsü. Iba ya odang ashir masü saka asen north east nung Tripura nung ataloka aruba aser parnok tanü tia kechi nung ali yangji ajemdaker lemsateper. Tripura ya tribal agi akümba state ka lir saka asen Naga lima amai Article 371A mesüra ILP amala temzüng  kecha  agia tribals temji wazüka mayu aser Bangladesh nungi aser India nung tesem balala nungi shishilembar aser aayanger arua settle asü aser mapang tatsüka nung itemji yongsük teimba aküm aser maparen ajunga nung parnok temaba kümer yimsüsuba menden tena bendangertemi atsüngadok aser tanübo sensopurtem alar jenjangi yir pei lima nung bendanger kübok ola makai alir. Küsa tia jagi asen Naga nungertema aitsü menua mali. Iba ama tarutsü lendong liaka iba ya telok tentet yimten aser Arogo shingai-a jembia mangashir, asen Naga lima atema ochi nung taroki ia shisadanger aser khuret abener mali asü?  Nüburtemi mangateti  alinunga aji kangabo tai masü, saka lenirtemibo angatettsü tim aser angateta alitsü ta imlar, saka angateter kecha action magira ajibo kanga dang tai asütsü, anungji iba awareness ya nübur nem angatetdakja jembia  jajatsü mapang tongogo, asenok Naga nunger lokti tentet balala, yimten aser Arogo lenirtemi memenu dang iba ya tenzüka nüburtem nem angatetdaktsütsüla masü no?  yimten aser lokti balalai mejembira Arogoi danga ajungshia tenzüktsüla masü no? Khristar Arogoji-a alima nung alir asünung tanülar wadang dang masü saka alima tajungba küma yanglushitsü aser Tsüngrem chirtem asoshi wazüka ayutsü maparen nungbo tasü itta aser meranga nokdaktsü kanga dang tim, asenoki World History nung Arogo-i alima taküm tenla yanglushiba aiben züngshia aruogo, 20th century tatembanglen asenok aikati ngua South Africa nung apartheid yimsü anema raraba mapang Arogo-i shilem tuluba agia rara takok anguba asenoki nguogo, talisa Archbishop Desmond Tutu shibai akümli tepiyong Apartheid anema jembia shiti zülua jaja aru aser iba yongji pa nem alimai Nobel Peace Prize 1984 nung agüja liasü, pai anir Arogo ajunga apusoa nüburtem ajungshia par linuk tesem ajunga sema jaja nüburtem nokdakdaktsü aser takok tulu angu. Iba ya angudang alima ajungai South Africa Arogo aser nüburtem tenüng asang. Kesa tashiji Arogo ajak dak lir saka asenoki mamshir aser ano nübur aikati Arogoji alima yimten nung mamushitsüla ta bilemer.  Aji kanga dang tai ta ni bilemer, kechiba süra Khristan lima ajunga nung laishir mongintemi anir nüngdakba mapang nungbo tasü itta taküm-a tenla-a alima nung temelenshi tulu bener aruba ajanga dang tanü alima advance süa tia tajungbai bener arua asenok yangji alir, saka alima nungji tamajung aser lendongji teti lir anungji asenok saksalema alitsüla aser aji atema platform tajungtibaji Arogo lir. Anungji Arogotemi tetsübu aser apusoa nüburtem nem tangatetba agüjang ta nibo mepishir, asenoki item ajak ya meteta yurabang Kashmir nung inyakba ama asenok dangi-a arurabang idangji tapet action agitsü asenok renema alitsü aser aji kanga dang nüngdaker ta ni bilem nung kü tangatetba nenok den lemsatepa zülur.