Tanü asen lima yimten yimli yanglushiba mapa nung ochi tangatet lanur tashir tawa nüngdaker

  ~ Mr. I. Rongsen Jamir, Ex-Pastor, Dhansiripar.

Tesüiba putu nunga yimten yimli yimsüsüba otsüji züngdangra linük aisünung tangatet lanur lenirtemi anir nübor ajaki yimten teraksa yanglushitsü apusoba angur. Tesüiba pututem kaketji züngdangra China nunger yimten teraksa anema apuso aser alimai parnok soita meyutet aser asen India lima nunga nüchiso atema Mahatma Gandhi nungeri anir tashiyim medeni temesüng nunger den raraa apusoba angur. Ano Romania yimli otsü kakettem nunga lanur tashitemetetertemi anir nisung ka ajanga tashi amshiba aser alima ajak pai dang atsüshiba mapa anema apuso. Item nüpur ajunga arakzüa apusoba nungji Romania chuba aser tebutsü samaba jangjaa angur. Kechiaser parnoki nüchiso ochi yimtenji agiena adoktsü merang. Iba ama linük nung temelenshi tulu adoktsüsa apusobaji bilemdangang, iba den arogoi shilem tulu agiba angur. Arogo ka nung Reverend kati temeshi sapang ka nungi sarasadema yamai ayimoktsü, yimten yimli aser arogo nung tamanger ajaki Tsüngrem nungi tashi meshir teraksa yimli ka yanglushitsü ochi nung rarangni ta ayimoktsüba otsü nungji angur. Tayongzükba tulu tanü asen lima yimten, lokti teraksa aliba ama yanglushitsü ajemajema melii nübor ajak apuso. Tanü iba lima nungji Tsüngremi mapa tulu inyakba angur. Item tsüngsen ajak nung lanur tashitemeteteri anir mapa takok tulu ngua apusoba angur.
Küm ishika ogo Iran nünger otsüji reprangdangra par tetsü tebou yimsü nungi yimsüsüa aruba chuba SHAH anema lanurtemi apuso aser iba yimsüsüba tamajungji atsüngdok. Alimai sota meyutet yamaji tanü asen lima temelenshiba ka agidi süra lanuri yimten aser nübor meimba (Nangpong Lanur) tashirtemi anir apusotsüla.
1. Yangi yimten shisa rajemer (Political scientist) kati yamai ashiba angur. Kodang linük nung rongsen kütdangsüba ochi mashi amshir, tetezü kar aika, kar ishika ta lemsaa amshidir, iba linük nungji temelenshi adoktsü ana nung lir ta sayur.
2. Koba linük nung rongsen tashi kar ket nungdang lidir, iba linük nungji temelenshi adoktsü ana nung lir ta sayur.
3. Tenteta akaba yimten kodang tashi meiti ozüng timi meyuteti kümdir yimten yimsüsüba petsaprong lidir, iba linük nungji temulung melemtep adoker. Iba linük nungji temelenshi adoktsü ana nung lir ta sayur.
4. Tang aliba yimten inyakyim dang nungi danga tajungba inyakyim aser yimtenren lir ta angatetba aser süia aruba kechisa tamakok teraksa lir, item ajak melentettsüsa teraksaji takoktsü ta angateta kümra temelenshitsü ana nung lir ta sayur.
Alima nung temelenshi bener aruba telokji teküpbok tajemrep tia nung alir tem nungi masü saka tanü tangteter temetetertem shisatsü nung takotet, nübor aser alima asadanga meimba ajanga temelenshi bener arutsü, anungji tanü asen lima melenshitsü atema jenjang ka atakteta lanurtem (Züngyangshiang – Rejuvenation) agia tokang.
Tanü asen lima aginüba temelenshi yimtenji tashiyim tetsükchitep, azü tokshiba agi masü saka yimjung tangatettep agi temelenshiji bener arutsüla.
Sürapang tanü lanur tangatetertemi koma inyaktsüla?
Mezüngbuba pei taküm melenshitsüla. Temelenshi takümi temelenshi bener arutettsü, na memelenshira nai tangar memelenshitettsü. Tashitemetet taküm kati teküpbok jenjang nung alir shisa tajung agi yaritettsü. Angji asen sasa melenshidi aser asen lima melenshitsü apusodi.Joko mapang tongja tongogo tsükchir tapu tapu tenokdangba alitsü akok saka tasü itang, tsübua telima. Lai o nung alima tamang tia nung alidang, Yisu asen limai temelenshi bener arutsü. Pa sülen anidaka amangertem iba tsüngsü nung arogo meteni yimten nung takok mengui mali. Anungji arogoi ajemajema amalitsüla. Rom yimli nung chuba Neroi Khristantemji yiar ta aja saka item Khristan yiartemi alima akokba otsü lir. Tanü tashirtem kaket nung yamai shia angutsü, Khristantem to yiar masü saka nüchi telok ta shia angutsü, saka Rom chuba Nero to yiar ta zülutsü, anungji adianutem ibai apusoa teraksa yanglutsü mapang tajung. Saka shirnoki pa temeim yimlibilem nung yimlar parnok madak Kibuba tenük teti lir tasüba nungi pai parnok kümzüktsü. (T.Ken 33:17-19)