Tanü asen Naga lima loktiliba nung libaliro yimya nung temelenshitsü jenti lir, item rongnung tongtipang kar yamai lemsateper

(Yashi adok nungi…)

Yamaji benjung-bentsü tali meroba, sapuba aser jangraba ajanga tanü asüng aiür-asangurtem aikati koba benjungsa arudir yangji sangwa-zünga ayaterm mapang kima-yimdong nung asaya menütep jangra-pangra, drama-tem ajitsü jangraa jajadang machi-majemtsü chia-jemer tama ateploktsü ateploker. Iba ama (party-party) telok-telok ammang piyong jaja dang (programme) sentong aika nung shilem tajung tulu-lu agir aser tesülen mapang kangabo memenui aiürtem karbo tepok-a tululu kümadoker alir. Yamaji tetsü-o tebu nabo asen jala aiürla tu Tsüngrem metetba nung yintetdar ta bilema, aonung shia la atema Tsüngrem dang sarasadema ozü jala tu tarutsü mapang ka nungbo tazüngba (education) bushiba nung mongin küma alima lennir tajung kaka akümtsü ta mangdang tulu yur alidang, asen jala tajungla tu agi sayatenya nung kinü tanur ka asor. Aser tanur sentsü (colour) tu tera nakremer tetsü memesük asor aser medemtsürla tu agibo sentsü tera mesüngtor ka süogo ta angashir. Yamaji tanur sentsü (complexion) jungrara ka tu soteter liyonga-mesüyonga aodang school /college azüngtsü tu tithemer aser tanga tebilemtsü aika agi sünger alidang, tsüraburi akhi mapang meima aliba tu tangbo tartsütang arütsür, aser iba den külemi la sorupangru tu memesük akümer. Ano yimer yimsangertemi, medemertemi la tu angudang temulung kanga ayangseta repranger, aser lar tsürabur karibo la tia tu angudang kanga meimba agi la tang mashie lai mangudang miima (secretly) ajeper, tetezü la tia tu yamai ang aküm na ta shisadanger. Tamalenbo la aiür aliba mapng tu la sorupangru, tsüngdenkuden onsara ajungba tu agi asangurtem aika kanga puasa (attract) liasü. Saka tangbo joko temelenshitsü majung kümadoker, aser kodangsa lar kinü tanur tu ajepba angashir, lai tanemi tang tanur yipden anasai aor aser tanur dak tu nemeter yamaisa jembia ashir, tebusang, tenüla nai kü tia tu ya tashiang sayangtet-tsüogo na! ta asüktema ajeb dang kinungertemisa angashir. Saka koda asütsü ? Shidakba agibo na tia-ji nai raksaba dang, anungji joko shinga daka jashitsü matoker. Na aiür aliba mapang tu nai na sünütsü inyaka achi-ajem nung mazüoki aliba ajanga taoba indang teraksa tu meyanglushitetsa kümadogo. Nai sali tebang ka chinüdang, süngo tajung marok ka jemnüdang. nü tia tu raksaogo ni ta ashitsüba dak alaka, joko tanga aika jembitsü mali kümogo.

Anungji lanurtem kanga kümdanga liang aser nai nüsasa nü taküm meraksadangsa ne taküm mita alitsübaji koda tongtipang aser ne taküm ji ne kisüng indang masü ta bilemangma. Aiür-asangur kari pei takümji pei mulung, pei sünütsü asütsü ta bilema lira, nai naji tamachi ta angatettsüla.  Lipok 1:26. Asenok meimchir ya pa mesükba nung yanglu.

Yamaji Asangurtem atema olen ka shiner, ajemajema angaa liang, na asoshi tekümdangtsü o ka shidi. Na ano asangur lanur ka dang, saka anojungi na tanur tebu ka akümtsübaji temulung agia makoker, aser alima nung na ano tatsükabo junga jangratema alitsü melena akümlir wadang khuret timtem tulu benloker alitsübaji kanga tang tesasatsüka akümer. Yamaji koda masüba tiaji ajurua aiür-asangurtem aika kibongtem nung meyanglushtetba taküm lir. Tazüngertem koda ? Ner kibong nunga iba tashidak yagi karbo tonger alitsü shibai metet. Tsüngrem dang shiang, paiang anebtsütettsü akok. Shi o kati yamai ashir, tanü lanurtemji asüng linük tanishir tajung kaka akümtsü ana nung lir. saka iba ama shin-o-tuluji amadoker pei sünütsü inyaka jajaba agi asen teyanglur Tsüngrem jashidaktsür. Yamaji achi-ajem nung mazüoki jaja alidang nü dangi tia tamajung ka arur aser tamagitsü mapa aika nung na pungsema nai nesasa tangar dang naji teburchi ama ka sayunüdang lendong tulu kati iadoker alir. Oda alimaibo ne dak tamang kateta ne sempet Tsüngremi agütsüba tu agi nübur tenzüka alitsü melena, alima sanger nemang timtem tulu bener arutsüba angudang na atakatemang nung lir ta metetangma. Saka shirnokisa Tsüngrem akümtsübua taküm kaji peisasa azüoka libaliroyonga oteter parnok temoatsüba, kechiaser parnoki tarutsü aliba alima senmangji amangtsü. Mathi  5 : 5.