Tanü Assam nung menden 61, WB nung 31 atema election agir

Guwahati/Kolkata, April 10 (Agencies): Assam aser West Bengal na nung April 4 nü assembly election agiba sülen maneni Hombarnüa state ana nung menden 92 atema election agitsü.
Assam nung assembly menden 61 aser West Bengal nung menden 31 atema candidate ajak agi parnok 688 lir.
Assam nung menden 126 nungi Hombar menden 61 atema candidate ajak agi 525 lir. April 4 nü Assam nung menden 65 atema election agia liasü.
Tang state sorkar tashi nung aliba Congress nungi Chief Minister, Tarun Gogoi-i pezübenren atonga yimsüsütsü nükjidong yur tokteper. Bangladesh nunger ozüng alema state telungi aitba onük tongtibangba sür Congress, BJP-AGP-BPF teloktep aser AIUDF tsüngda  toktepdar.
Congress-i menden 57, AIUDF-i menden 47, BJP-i 35 aser par teloktep- Bodo Peoples’ Front-i menden 10 aser Asom Gana Parishad-i menden 19 nung tokteptsü. CPI(M)-ia menden 9 nung, CPI-i menden 5 aser Independent candidate 214 lir.
Tongtibang candidate  rongnung cabinet minister- Rakibul Hussain, Chandan Sarkar aser Nazrul Islam nunger,  AGP nungi anaben tashi Chief Minister inyaksang Prafulla Mahanta, AIUDF tongti, Badruddin Ajmal aser taoba mapang Congress minister aser yaküm BJP nung adensang, Himanta Biswa Sarma nunger lir.
Ano West Bengal nunga menden 31 atema tetsür 31 densema candidate 163-i tokteptsü. WB assembly nung menden 294 lir. April 4 nü Assembly constituency 18 nung election agia liasü.
State sorkar tashi nung aliba party, Trinamool Congress, Left Front-Congress teloktep aser BJP tsüngda meneptepa tokteptsü. Parnok ajaki menden 31 prong nungi toktepdaktsür.
Hombarnü tongtibang candidate rongnung CPI-M nungi ponguben tashi MLA aser Opposition lenir, Surjya Kanta Mishra aser Congress lenir Manas Bhuniya na densema lir.
Ano MLA tambusang, arishi küm 91, Gyan Singh Sohanpal-i maneni Kharagpur Sadar menden atema BJP state Tir, Dilip Ghosh den tokteptsü.
Assembly election osang May 19, 2016 nü sangdongtsü.