Tanü Assam nung PM Modi-i India nung apu talangtiba lapoktsütsü

Guwahati, May 25 (Agencies): Hokolbarnü Assam nung Ato kilonser, Narendra Modi-i linük nung apu talangtiba, Dhola-Sadiya apu lapoktsütsü.
Brahmaputra ayong nung yangluba apu ya ajanga Assam aser Arunachal Pradesh state na Lohit ayong ajanga sendakteptsü. Iba apu ya ajanga state ana tsüngda tamalen ghonda trok indoka ainlen senzüba mapang kümzüka ghonda ka dang agitsü.
Kilometer 9.3 talang apu ya sen crore 2,056 intoka yanglu aser iba apu ya ajanga Arunachal Pradesh nung Dhola aser Assam nung Sadiya na sendakteptsü.
Iba apu yangluba ajanga Assam, Rupai nungi Arunachal nung Meka, Roing tsüngda kilometer 165 tajemba kümdaktsür.
Iba apu yangluba ajanga Northeast nung anogoshia totzü nung intokba sen lakh 10 shi kümzüktsü, ta Road ministry-i asadangtetogo.
Tang linük nung apu talangtibaji Mumbai kübok Mahim Bay nung lir, aser tang Navayuga Engineering Co. Ltd-i yangluba Dhola-Sadiya apu ya kilometer 3.55 agi Mumbai nung aliba apu dang nungi talangba asütsü.
Iba apu ya 2011 küm yanglu tenzük aser 2015 küm tashi nungbo renemtsü sentong liasü, saka küm ana tali agisemogo.
Kasa anogo nungsa Ato kilonser, Modi-i Dhemaji district nung Indian Agricultural Research Institute (IARI) amenoktsü aser Guwahati kübok Sarusajai nung All India Institute of Medical Sciences (AIIMS) amenoktsü atema lung azünga yutsütsü.
Assam nung BJP sorkar küm ka ajungba aser BJP-i aniba NDA sorkar küm asem ajungba benjungmung tenzükja Ato kilonseri Guwahati nungi linük nüburtem den jembitsü.