Tanü asür Wb.T.Sentichuba mang aremtsü

Dimapur, Nov. 26 (TYO): Nagaland nung taoba kilonser asür Wb.T.Sentichuba Ozüküm den Brehostibar anüngdang Diphupar ‘B’, Dimapur nung par kidang mangyimertem aika adenshia asüpila sentep agiogo.
Pa ya Bodbar anüngdang ajungbena temang nung timtem adoka mozü kidangi anir ao saka yangji pa arishi tembang. Pa arishi küm 80 liasü.
Pa ya 1968 küm Gauhati University nung M.A renemba tashitemeteter aser yimsüsür ka liasü. Pa 1964 küm nungi 1967 küm tashi Ao Kaketshir Mungdang nung Tir inyaka liasü, aser 1969 küm nungi 2013 tashi nung tenetben tashi election nung adoka Nagaland tatar senden nung züngsem dang masü saka Cabinet minister anabenren tashi inyaka liasü.
Asür T.Sentichuba ya meranga inyakba, tenendak, peisasa azüoka litetba senso aser nübortem dang meima ochishia yimsü asüba yimten lenir ka liasü, ta asüpila sentep nung jembirtemi kuli tajung agütsüogo. Pa ya saisapong nunga tajung liasü.
Brehostibar nü Diphupar nung asür den tepila sentep agir pa mang par tetsü tasoli Mongsenyimti yimtaki bener ogo aser yangji pa den tesüsaba asüpila sentep sentong ka Hokolbar anepdang 8:00 ako nung alitsü yimten aser Arogoi renema lir. Iba sentep agir külen Mongsenyimti nungi adokba Naga nunger Wabong T.Sentichuba mang par tetsü tasoli nungji aremtsü.
Asür T.Sentichuba asüba osang angashia asür kinüngertem den mangyim jashi lemsatepba osang Odisha Angh, Dr.S.C.Jamir aser Nagaland Chief minister T.R.Zeliang na den lenir aser lokti tentet aikati lemsatepa liasü.