Tanü bank ajak shibangtsü saka ATM bo lapoktsü; ATM nung sen 2,500 agizüktettsü; sen 4,500 melenteptettsü

New Delhi, November 13 (Agencies) : Guru Nanak Jayanti anogomung nüngtem nung November 14 nü bank ajak shibangtsü aser iba ya Reserve Bank of India indang annual calendar nung ajemdaker sodi anogo lir. Ajisüaka, Automated Teller Machine (ATM) tembo meshibangtsü.
Iba sodi anogo ajanga public tem kanga timtemtsü kechiyong sorkari senpak 500 aser 1000 agienba sülen nübortem sen melenteptsü aser agizüktsü atema bank aser ATM nung mesemi nungteper.
November 8, 2016 nü kanga dang ajungbena Centre sorkari senpak 500 aser 1000 agienba osang metetdaktsüba sülen tanü tashi nung sen crore lakh 2 shi bank balala nung bendenogo.
Deobar nungi Delhi, Mumbai aser Bhopal yimtitem nung senpak 500 tasenba agütsütsü tenzükogo aser ano State Bank of India ATMs kar nung sen tasenba agütsütsü atema yanglushiogo.
Deobarnü Ministry of Finance-i sen agütsüba maparen asadangba sülen, ATM nung sen 2,500 agizüktsü aser bank nung sen 4500 melenteptsü indang osang metetdaktsü.
Ano, bank account tem nungi hopta nung sen 20,000 agizüktettsü ta mezüng metetdaktsüba nungi meyirjang pezü (24,000) talila agizüktettsü ta parnokisa metetdaktsü.
Ministry of Finance-isa senior citizens aser Divyang nisungtem tarensen balala noktaktsü atema mapa inyakang ta tetuyuba agütsü.
Tongtipang mozükitem nung ’emergency banking transaction’ atema bank temi mobile banking vans anepalutsüla, ta parnokisa tuyu.
Ministry of Finance-isa, pensioners asoshi annual life certificate agütsüba anogo January 15, 2017 tashi mapang apuloktsüogo. Iba ya tan November ita tashi nung agütsütsü atema liasü saka mapang atsülangogo.
“Banks aser post offices ajak dang ‘denomination notes’ ajak timi agütsütsü atema tetuyuba agütsüogo. Bank ajak nung ‘denomination notes’ tila peria ayutsü aser agütsütsü atema shiogo” ta Ministry of Finance sangdong nungsa metetdaktsü.
Parnoki, State Chief Secretary tem dang, mobile banking vans aser Banking Correspondents (BCs) ajanga meta talanglang pilar aliba tesemtem nunga sen agütsütsü/melenteptsü indang mapa inyaktsü tetuyuba agütsü.
“Mozüki, chiyungtsü agütsürtem, tent house amalatemi Cheques/Demand Drafts aser online payment transfer amala magizüker ta osang angazükogo. Nisung kari iba timtem ajurura, tashi mangartem ozüng tapet agi merenshitsü atema pei telongtet District Magistrates/District Administration nem osang sangoktsütsü metetdaktsür” ta parnokisa ashi..)