Tanü Bihar assembly menden 49 atema election agir

Patna, October 11 (Agencies): Bihar nung assembly eletion atema Ato kilonser Narendra Modi, Bihar chief minister Nitish Kumar, Congress tatong Tir Rahul Gandhi aser RJD tongti lenir, Lalu Prasad nungeri pei pei party aser teloktep party atema nüboyima sentong balala nung jembiba sülen asüng, Hombar nü Bihar Assembly election mezüngbubaren nung menden 49 atema election agitsü renemogo.
Additional Chief Electoral Officer, R Lakshamanan-i ashiba agi, Bihar assembly election mezüngbubaren nung district 10 nung vote agütsütsüpur 1,35,72,339-i candidate 583 rongnungi candidate 49 shimtsü.
Lakshamanan-isa, Hombar anepdang 7:00 ako nungi vote agütsü tenzüktsü, ta ashi.
Menden timbaka atema polling nikongdang 5:00 ako nungbo atemtsü, saka Maoists telungpurtemi timtem agütsüba tensa apir constituency kar nungbo nikongdang 4:00 ako aser 3:00 ako tashi nungbo polling tembangtsü, ta pai ashi.
Vote agütsütsüpur nisung 1,35,72,339 nungi tebur 72,37,253, tetsür 63,17,602 aser enoch (third gender) 405 lir.
Lakshamanan-isa, candidate 583 rongnungi tetsür 54-i tokteper, ta metetdaktsü.
Menden 49 nungi BSP-i candidate 41 toktepdaktsür.
Mezüngbubaren assembly election menden 49 nungi BJP-i candidate 27 toktepdaktsü, iba sülen JD(U)-i candidate 24, RJD-i candidate 17, LJP-i 13, Congress-i 8, Rashtriya Lok Samata Party-i 6 aser Hindusthani Awam Morcha-i 3 toktepdaktsür.
Left Front nung teloktep party trok- CPI, CPI-M, CPI-ML, Forward Block, SUCI (C) aser RSP-i iba election nung senteper tokteper.
CPI-M-ia candidate 12 toktepdaktsür.
Lakshamanan-i ashiba agi, mezüngbubaren election polling station 13212 nung agitsü aser election süngjema agitettsü atema security takang agütsüogo.
Bihar nung October 12 nü nungi tenzüka November 5 nü tashi nung election telemsa pongu nung agir aser November 8 nü vote azüngtsü.
Polling station ajak Central Para Military Force-i anüktsü aser nisung mamenba tayimtsü den külemi helicopter amshitsü.
2010 küm Nitish Kumar’er party, JD(U)-i item menden 49 nungi menden 29 tashi nung takok ngua liasü.
Taoba election nung BJP aser JD(U) senteper menden 13 aser RJD-i menden 4 nung takok ngua liasü.