Tanü Bihar nung assembly election shilem pezübuba agir

Patna, October 31 (Agencies): Deobar nü Bihar assembly election shilem pezübuba nung assembly menden 55 atema nüburtemi vote agütsütsü; Taoba assembly election nung item menden nung BJP-i par teloktep party, JD(U) den senteper menden aika nung takok ngua liasü.
2010 Bihar assembly election nung Muzaffarpur, East Champaran, West Champaran, Sitamarhi, Sheohar, Gopalganj aser Siwan district tem nung aliba menden 55 nungi BJP-i menden 22 nung takok ngua liasü. Ano BJP teloktep JD(U)-ia menden 24, RJD-i menden ana aser Independent candidate temi menden asem nung takok ngua liasü.
Ajisüaka tangbo iba tensaji melenshiogo. Tanbo Grand secular alliance nungi RJD-i menden 26, JD(U)-i menden 21 aser Congress-i menden 8 nung tokteper.
Ano külen NDA teloktep nungi BJP-i menden 42, LJP-i menden 5, Hindustanti Awam Morcha-i menden 4 aser Rashtriya Lok Samata Party (RLSP)-ia menden 4 nungi tokteper.
Deobar nü item district tem nungi vote agütsütsüpur 1,46,93,294-i polling station 14,139 nung vote agütsüba ajanga candidate 776 tia latettsü. Item candidate rongnungi tetsür candidate 57 lir.
Security tensa apir constituency 43 nung polling anepdang 7:00 ako nungi 5:00 ako tashi agitsü aser constituency 8 nung nikongdang 4:00 ako nung tembangtsü aser constituency 4 nung nikongdang 3:00 ako nung voting tembangtsü,” ta Additional Chief Electoral Officer, R Lakshamanan-i ashi.
October 12 nü nungi tenzüka agiba election shilem telemsa asem nung assembly menden 131 atema election agiogo. November 5 nü tesüsabuba shilem nung menden 57 atema election agitsü.
Lakshamanan-i ashiba agi, Bihar nung election maparen tenzükba sülen raraba hadir 191, tapoktsü oset 56, cartridge 595 aser bomb 17 puogo. Iba den külemi mejangjaba lenmang nungi anguba sen crore 5.32 aser yi litre 1,58,246 puogo.