Tanü Biplab Deb, Tripura Chief Minister tenangzükba agitsü

Agartala, Metsüremi (March) 08 (Agencies): Rogonü (Hokolbar) Agartala nung aliba Assam Rifles ground nung Biplab Deb, Tripura Chief Minister inyaktsü atema tenangzükba agitsü; aser iba ya tang mezüng Tripura nung BJP sorkar tenangzükba agir asutsü.
BJP-Indigenous People’s Front of Tripura (IPFT) teloktepi tawa agiba Assembly election nung takok ngua tesüiba küm 25 tashi yimsüsüba sorkar, CPM-i aniba Left Front atsüngdokogo.
Menden 60 aliba Assembly nung BJP-i menden 35 aser IPFT-i menden 8 nung takok ngua liasü.
Arishi küm 48, Deb-i Metsüremi (March) 6, 2018 nü Tripura Angh, Tathagata Roy ajurua sorkar akumtsü atema asüngdanga liasü.
Metsüremi 6, 2018 nü Union Minister, Nitin Gadkari-i, Jishnu Debbarma Deputy chief minister shimtsü, ta sangdonga liasü.
Debbarma ya ano MLA meshim, kechiyong pa toktepba constituency, Charilam (Scheduled Tribe) nung CPM candidate asüba ajanga election anogo atsülanga lir.
Sorkar tenangzükba agiba sentong nung Ato kilonser, Narendra Modi, BJP Tir, Amit Shah aser Northeast nung BJP-i yimsüsüba state asem nungi chief minister tem adentsü, ta state BJP otongdar, Mrinal Kanti Deb-i metetdaktsü.
Paisa, “Iba sentong nung adentsü atema BJP-i yimsüsüba state ajak nungi chief minister tem aser BJP parliamentary board züngsemtem jaokogo,” ta metetdaktsü.
Deb ya mapang talangka nungi RSS volunteer inyaka arur aser state nung BJP-i takok anguba ya pa ajanga lir, ta züngshir.
IPFT Tir, NC Debbarma-i, cabinet tasenba nung party-i menden ana angutsü; BJP lenir aser North-East Democratic Alliance (NEDA) chairman, Himanta Biswa Sarma den senden ka amendang ibaji lemtetogo, ta metetdaktsü.