Tanü Cabinet senden nung 33% onük jembitsü

Kohima, December 12 (TYO): Tetsür nem shilem 33 lemzükja Urban Local Bodies (ULBs) election magitsüla ta kin balala nungi tongti teloktemi sorkar dang shiaka, Nagaland state sorkari district ajak sema tongti teloktem dang sorkar telemtetba agizüktsü atema mesüzüktsü merangtsü.
Iba osang ya Chief Minister T. R Zeliang-i Hombar nikongtsütsü osangbener den sensaksemdang metetdaktsü. Taonung State banquet hall, Kohima nung Legislators’ Pre-Christmas sentong nung pai iba olen lemsatep.
Asüng (December 13) nü state cabinet senden ka amentsü aser iba nung Naga Hoho aser ENPO nati anogo 15 tsüngda September 22, 2012 telemtetba meyipa agitsü atema takhangba agütsüba benoka jembitsü, ta T.R Zeliang-isa ashi.
Asüng amentsü aliba senden nung, MLA tem dang pei pei kin teloktem den ajuruteptsü aser parnok dang ULBs nung tetsür nem 33% lemzüktsütsü asoshi sorkari telemtetba agiba indang onüktem angatetdaktsütsü atema mepishitsü, ta paisa shisem.
Naga Hoho aser ENPO nati anogo züngzüktsüba atema T.R Zeliang-i ashiba agi, Naga Hoho-i telemtetba agiba ajakji United Naga Council of Manipur dena ajaki mulunga agiba asütsüla.
Naga Hoho nung kin pungu nungi teloktem dang dena lir aser parnoki telemtetba agitsü süra, Manipur nungi UNC dena tanüngba tribal hoho ajak jaoktsüla, ta paisa metetdaktsü.