Tanü Centre & NSCN-IM tsüngda senden amentsü

New Delhi, October 23 (Agencies): Centre aser National Socialist Council of Nagaland (Isak-Muivah) tsüngda October 24, 2019 nü New Delhi nung kanga dang tongtipang senden ka amentsü.
Iba senden ya kanga tongtipang kechiyong iba ajanga Centre aser NSCN-IM tsüngda tekong merangtepa aruba onükte angatetteptsü akok. Telok ana tsüngda Naga wako aser temzüng balaka ayutsü onüktem ajanga tekong merangteper.
Nagaland sorkar nungi osang ka angazükba agi, NSCN (I-M) den yimjung tenangzüktepji raksatsü mesüra tajungba akümtsü ta asüba tia ka nung lir.
“Sorkar atema interlocutor aser Nagaland Governor R.N. Ravi-i October 31 tashi nung NSCN (I-M) adenyonga mesüra madenyonga telemtetba ka agitsü ta sangoktsüogo. Anungji, asüng NSCN-IM den sendenji junga tembangtsü mesüra mejungi tembangtsü akok,” ta osang ajangasa ashi.
October 10 nü R.N. Ravi-i New Delhi nung Thuingaleng Muivah den iba onük atema senden ka menogo. Interlocutor-cum-Governor-isa tawa tu Prime Minister Narendra Modi den iba onük lemsatepogo.
Asüng New Delhi nung amentsüba senden nung Nagaland chief minister Neiphu Rio adentsü.