Tanü Chhota Rajan India-i anir arutsü akok

Bali (Indonesia), November 02 (Agencies): India-i kanga bushia aliba telungpur tetsüdi, Chhota Rajan taoba hopta Indonesia, Bali yimti nung apuba sülen asüng pa India linüki anir arutsü akok, ta osang ka ajanga ashi.
Yashi India nungi telok ka Bali tonga ogo aser pa India linüki meyipa anir arutsü atema inyaktepdar; Rajan Delhi-i mezüng anir arutsü akok.
India nungi aoba teshimtet telok nungi CBI nungi ketdangsertem aser Mumbai police o Delhi police nungi ketdangsertemi tepouktaki oa Rajan ajuruogo.
Arishi küm 55 Rajan anema Mumbai nung mozü shibelenba, rakzükraktemba aser nisung tepsetba ken o 70 dak tema benoka lir. 1995 küm Interpol-i notice ka agütsüba sülen pa küm 20 tashi linük balala nung jenshia arur tatemsa pa Sydney (Australia) nungi tayimtsü ka nung Indonesia, Bali tonga arur tayimtsü nungi aluba mapang police-i pa apu.
Taoba hopta Rajan-i, Bali nung pa atema security tashi mait aser pa temang nung mokokmin lir ta shia liasü.
Deobar nü Indian Embassy ketdangser, Sanjeev Agarwal Jakarta nungi Bali tashi oa Rajan minute 45 shi ajurua liasü.
Bali airport nung Rajan apuba mapang pa ket nung Mohan Kumar tenüng amer Indian passport ka liasü.