Tanü Chumukedima nung shishilembartemi ghonda 12 shibangtsü

Dimapur, Feb. 29 (TYO): Chumukedima nung mejangjatetba nisung kari aayanger ana dak injang agi akahba anema February 29, 2016 anepdang 6:00 ako nungi nikongdang 6:00 ako tashi Chumukedima kübok dokan aser shishilembadak ajak shibangtsü, ta Chumukedima Chambers of Commerce and Trade Association (CCCTA)-i telemtetba agiogo.
February 28 nü Chumukedima Chambers of Commerce and Trade Association (CCCTA) Chumukedima Town Mother Association (CTMA), Chumukedima Town Youth Organisation (CTYO), Chumukedima Students Union (CSU), Chumukedima Tribal Union aser Chumukedima GBs rongdak senden ka amendang iba telemtetba agi.
Honibar aonung 7:30 ako meta 7th mile (Khuova road junction) nung mejangjatetba nisung kari Andul Sukur aser Ainul Haque na dak injang agi akah aser tena District Hospital Dimapur nung anepaludar. Tena ya Bamboo enterprise ka nung anogoshi aayanga mapa inyaker liasü, ta CCCTA-i sangdong nung shia lir.
CCCTA-isa ashiba agi, February 1, 2016 nü aou shishilembar ka dangi shidi ka nung hopta ka tsüngda sen lakh 1 agütsütsü tetuyuba agüja liasü.
CCCTA-i sorkar dang aibelenertem pua merenshitsü aser tensa reprangshimtsü atema security sepaitem talila mapa lemzüktsütsü atema takhangba agütsü aser parnokisa yirua alir nem teyari agütsütsü atema mepishia metetdaktsü.
Chumukedima nung tensa raksatsütsü meranga mapa inyakba kukua aitsür aser February 13, 2014 nü lemtetba ‘Sorkar Ka, Saru Ka’ nung masetshii noktaker, ta CCCTA-i sangdong ka nung metetdaktsü.
Ano külen, ACAUT Nagaland züngsemtemi Deobar nikongtsütsü mozüki dang yirua alirtem den ajurutepogo.