Tanü Congress Tir atema telemtetba agitsü

New Delhi, August 09 (Agencies): Tanü UPA Chairperson, Sonia Gandhi’er kidang senden ka amenba sülen osang ka ajanga, Honibarnü Congress Working Committee (CWC) senden nung Congress Tir shimtsü, ta metetdaktsü.
Taküm May ita nung Rahul Gandhi-i Tir menden toktsütsü atema telemtetba agiba sülen pa melen shimtsü atema Mukul Wasnik tenüng benoka lir, ta osang angazüker.
Honibarnü CWC senden nung küm 20 sülen tang mezüng Gandhi kibong nungi masüba lenir ka Tir shimtsüa akok.
Arishi küm 59, Mukul Wasnik ya taoba mapang Minister ka lir, aser organizational elections magi tashi pai Tir mapa bena atatsü.
Küm 134 putiotsü nung India nung yimtenren party tejentiba, Congress nung Tir mendenji Nehru-Gandhi kibongi timba bena liasü. Ajisüaka tang Gandhi kibong nungi yimtenren nung ajemoka alir asemprong- Rahul Gandhi, Sonia Gandhi aser Priyanka Gandhi Vadra nungeri Tir inyaktsü memelunger.
Osang angazükba agi, Congress asentenshitsü atema Mukul Wasnik nem iba menden agütsütsü.
Tanü senden nung adenertem rongnung AK Antony, Ahmed Patel aser KV Venugopal nunger densema liasü, aser parnoki joko tekaraba nung Congress Tir shimtsü atema telemtetba agiogo.
Congress jenjang mejungi aliba mapang ka nung tawa BJP-i aniba sorkari Jammu & Kashmir nung Arrla 370 agienba anema Congress-i nokdakdang party lenir karibo sorkar telemtetba pusema jembiba ajanga bangdak lenirtem jashir.
Arrla 370 agienba atema Parliament nung Congress lenir Ghulam Nabi Azad aser Kapil Sibal nungeri sorkar sashia aitsü, ajisüaka Parliament adener Congress lenirtem-Jyotiraditya Scindia, Milind Deora, Jaiveer Shergill, Karan Singh aser Janardhan Dwivedi nungeribo sorkar telemtetba pusema jembiogo.