Tanü Delhi nung India-Pakistan foreign secy. senden amentsü

New Delhi, April 25 (Agencies): Mongolbarnü India aser Pakistan foreign secretary senden amentsü akok. Mongolbarnü Pakistan Foreign Secretary, Aizaz Ahmad Chaudhry Heart of Asia (Istanbul Process) senden nung adentsü atema Delhi-i arutsü, aser iba mapang nung pai Indian foreign secretary, S Jaishankar ajurutsüa akok.

Osang ajanga ashiba agi, kidanger linük ana nungi tongti ketdangsertem senden nung kiralongrartemi Pathankot amakba onük densemtsü benoka lir.

Taküm January 2 nü kiralongrartemi Pathankot nung Indian Air Force (IAF) indang airbase amakba sülen India-i, kiralongrartemji Pakistan nung amenoka aliba Jaish-e-Mohammad (JeM) kiralongrar telok lir ta ashi.

Iba tatalokba sülen linük ana tesentaktep atema Foreign Secretary senden amentsü aliba thinena liasü.

Ato kilonser, Narendra Modi-i ajungbena Lahore (Pakistan) semdanga Pakistan Ato kilonser, Nawaz Sharif ajuruba sülen hopta ka lir kiralongrartemi Pathankot amakdang kiralongrar nisung trok aser security sepai tenet asü.

Iba tatalokba sülen January 5 nü Ato kilonser Modi-i Sharif dang phone ajanga Pathankot amakertem nem tekaraba nung temerenshi agütsütsüla ta shia liasü. Iba sülen Pakistan Ato kilonser Sharif-ia, iba tatalokba bushisüngdangba maparen nung pai akokba tashi India nem teyari agütsütsü ta ashi.

Taküm January ita nung Foreign Secretary senden tenzüktsü anogo ana shi dang lia Pakistan osangbenertem ajanga, JeM tongti, Masood Azhar ji ‘protective custody’-i bener ogo, ta sangdong. Iba sülen India-i, linük ana tsüngda foreign secretary senden ji thinena tarutsü nung ang sendenji agitsü, ta ashi.