Tanü Delhi nung Jordan King-i Islamic heritage onük jembitsü

New Delhi, Tsüklai 28 (Agencies): Yangtepnü Delhi nung Jordan King, Abdullah II-i Islamic heritage aser tangatetba balala ajungkettsüba onük nung jembitsü, aser iba sentong nung Ato kilonser, Narendra Modi-a adentsü.
Abdullah ya Ainkar Muhammad nungi jazükba 41buba generation lir, aser pai alima nung nisungtemi alia bilema inyaksangshiba anema rara-a arur.
Iba senden nung Modi dak alia sorkar ketdangsertem aser Islamic institution balala nungi ketdangsertem, shisashirtem aser think-tanks züngsemtem adentsü.
India nung Muslim nunger nütsüng crore 17 shi lir aser ibaji India nunger nütsüng shilem 15 shi asutsü. Alima nung Muslim nütsüng jenti aliba linüktem rongnung India densema lir.
Jordan Chuba yasüng (Tsüklai 27) Delhi tonga aru aser pai anogo asemnü linük semdangba mapang nung linük ana tesendaktep jenjang tajungba akumtsü nükjidong nung linük semdangogo.
Jordan leniri linük semdangba ya kanga tongtibang, ta züngshia King Abdullah II bin Al-Hussein airport tonga arudang Ato kilonser, Modi-i protocol (inyakyim) raksaa pa agizük.
Kasa sentong nung Urdu oshi nung meyipzükba kaket- ‘A Thinking Person’s Guide to Islam’ sayatsü; iba kaket ya Abdullah’er kinünger, Prince Ghazi bin Muhammad bin Talal-i züluba kaket lir.
Prince Ghazi ya kanga nüngtugu shisashir ka lir aser Jordan nung Religious & Cultural Affairs Chief Advisor lir.
Iba kaket ya Islam yimsü chichiba ratettsütsü nükjidong nung züluogo, ta Islamic studies mongin kati metetdaktsü.
Prince Ghazi bin Muhammad ya UK nung aliba Harrow School aser US nung aliba Princeton University na nung zünga liasü.
Pai Trinity College, Cambridge University nungi mezüngbuba PhD angu aser tanabuba PhD ji Al-Azhar University, Cairo nungi angu.
Tawa Modi-i Jordan aser Palestine na densema West Asia nung aliba linük kar semdangba sülen hopta asem tsüngda Jordan leniri tang India semdanger.