Tanü Dimapur nung temulungertemi dokan shibangtsü

Dimapur, July 21 (TYO) : July 19, 2015 nü GPRN/ NSCN-i New Orchid shop, Dimapur nung inyaker Kahoto Zhimo dak kanga mejungi züka merenshiba atema July 22 anüngdang 12:00 ako nungi aonung 6:00 ako tashi Dimapur nung temulunger shishilembartemi dokan shibangtsü telemtetba agiogo.
Iba telemtetba ya July 21, 2015 nü DCCI office nung Dimapur Chamber of Commerce & Industry (DCCI), Business Association of Nagas (BAN), East Dimapur Business Association (EDBA), aser Chumukedima Chamber of Commerce & Trade Association (CCCTA) nungertem külem senden ka alidang agi.
Ibala inyakyim magizüker aser takoksa ajurur den külemi noktaker, ta sayutsü atema Dimapur nungi Chumukedima tashi nung temulungertemi dokan shibangtsü lemtetogo. Ajisüaka, iba mapang gari senzüsenbongba, office aser educational institution tembo tetsükdaktsü kecha majurutsü, ta DCCI, BAN, EDBA aser CCCTA sangdong ka nung metetdaktsüogo.
July 19 nü iba mapa inyakertemi tekaratiba nung State sorkari aputsü takhangba agütsür aser ibaji meinyak tashi onoki junger ta bilemba ama lungkak aitba sentong agiyonga aotsü, ta sangdong nungsa shia lir.
Tenangzükba agidaktsüba tezüluba nung Kahoto Zhimo ji Indian army den tesentaktep lir ta aitsüba atema kuli mali aser iba ya ozüng anema puoka ayuba aser meimchir taküm mapayui reshikangshi miimbangtsü atema züluba dang lir. Iba dak sendakba nung GPRN/NSCN sorkari tenangzükba agia aliba meyipa agitsü aser linük tenzükba wadang nungi Capt Hutoshe anentsütsü akhanger, ta sangdong nung metetdaktsü.
Iba denji külemi, August 2, 2014 nü East Dimapur Business Association tir, Solomon L Awomi den tenangzüktep agiba tezüluba agientsü takhangba agütsür, ta parnokisa shisemogo.