Tanü England o W.Indies na World T20 final asayatsü

Kolkata, April 02 (Agencies): England aser West Indies telok nati ICC World Twenty20 (T20) asayamong final India kübok Kolkata yimti nung asüng, Deobar nü asayatsü terenemshiba agia lir.
Telok anapronglai asüng takok ngua iba asayamong takok marok tanabenbuba agizüktsü alizüng ayuba osang jangjaogo.
2010 World T20 champions, England teloki tan asayamong nung 2012 World T20 champion, West Indies telok ken danga koka mali saka group stage asaya nung West Indies telok nem takok ngudaktsüba sülen England telok indang asaya jenjang kanga agi tajungba kümogo.
Eoin Morgan-i aniba England teloki runs 230 ajangteta South Africa madak takok anguba den külemi, New Zealand teloka semifinal nung tsükdakja kanga junga asayatsü tenzüka lir.
Ano külen, Darren Sammy-i aniba West Indies teloki mamangtettsüsa kanga junga shilem agia aliba yong asüng final asayaji telok kobai akoktsü ibaji metakzütettsüsa tang jenjang ajurura lir.
Aji oda, par telok rong nung takok anguba telok tan agi World T20 takok marok tanabuba agizüker telok akümtsü.
England aser West Indies telok nati asüng aonung 7:00 ako nungi tenzüka Kolkata kübok Eden Gardens nung par final asaya asayatsü.