Tanü Guwahati nung Naga-Assamese yimjung ken o jembitsü

Guwahati, Oct 08 : Naga nunger o Assam nunger na tsüngda teti yimjung nung alitsüsa tangatettep lenmang bushitsü asoshi merangdangba sentong ka Hokolbar nü Guwahati nung agitsü anogo lateta lir. Iba sentong nung state anaprongla nungi lokti tentettem nungi tongtibang lenirtem adenshia jembitsü jaoka lir.
Iba sentong ya Nanda Talukdar Foundation (NTF), Guwahati ajanga Indian Institute of Bank Management (IIBM), Khanapara nung alitsü ayongzüka lir. Iba senden dang ya “Naga-Assamese Round Table Talk” ta ajatsü renema lir.
State ana tsüngda mapang shia mangatettep adoker asünungji, iba tensa tiaji reprangdanga teti atema anendaktsütsüsa ken o süoka jembitsü asoshi iba sentong ya Assam nung nüngtugu osangbenertem Samudragupta Kashyap, Mrinal Talukdar aser Atanu Phukan nungertem longjemer NTF tenüng nung ayongzükba lir. Taoba küm 60 shi tsüngda state ana tsüngda mulungmelemtep, tsükchitep aser tamajung bilemba agi sünga liasü, anungji item shisatsü tamajungtemji endoker state ana putepa alitsübaji alimaia kanga imlar, ta parnokisa ashi.
NTF sangdong ka nung parnok tezülusang Mrinal Talukdar-i ashiba agi, iba senden ya otsüsütsüsa tongtibang senden ka asütsü aser idaki state shia nungi teshimtet pur trokrok den mongin tesayurtem, osangbener taintem aser lokti asoshi inyaker tongtibang nisung kar adentsü.
Naga nunger tsütsü nungi iba senden nung adentsü purtemji yimjung yanglur Wb.Niketu Iralui anir Naga Hoho nung tir P. Chuba Ozukum, Naga Mothers’ Association’s adviser Prof Rosemary Dzuvichu aser Naga Students’ Federation (NSF) nung president, Subenthang Kikon nungetem alitsü.
Ano, Assam tsütsü nungi iba senden nung adentsü purtemji nüngtugu tesayur Academic Prof Udayan Misrai anir Asom Sahitya Sabha tir Dr Dhrubajyoti Bora, AASU chief Adviser Dr Samujjwal Bhattacharya, Purbanchaliya Tai Sahitya Sabha tir Dr Dayananda Borgohain, aser taoba Upper Assam Commissioner Sayad Iftikhar Hussein nungertem asütsü.
Iba senden nung NTF tir aser Asomiya nung yimozülur, Pratidin Nitya Bora menden asütsü aser pai “Round Table Talk” len anitsü. Ano, NEC member Chandra Kanta Das aruagi iba sentong nung adentsü.
Iba ama state ana tsüngda lenirtem ajurutepdakja yimjung ken o jembiba ajanga kati ka dak temulung alemtsü aser akümtsübutepa alitsüsa taküm tasen ka tenzüktsü imlar ta iba sentong ayongertemi metetdaktsü.