Tanü India-i Pak MFN jenjang reprangshitsü

New Delhi, September 28 (Agencies): India-i Pakistan nem Most favoured Nation (MFN) jenjang agüja aliba reprangshitsü asoshi Brihostibarnü New Delhi nung Ato kilonser, Narendra Modi-i temaba jenjang nung senden ka ayongzükogo, aser iba senden nung India-i telemtetba kar agitsüa akok.

Hombarnü Congress-i sorkar dang Pakistan nem MFN jenjang agüja aliba agientsüla ta takhangba agüja liasü.

1996 küm WTO’s General Agreement on Tariffs & Trade (GATT) kübok India-i Pakistan nem MFN jenjang agüja liasü aser iba nungji India aser Pakistan napronglai sign süa lir. Iba tetezü, linük tsüngda aser WTO züngsem linüktem den parnoki trading partners ama amalitepa inyaktsüla.

Assocham osang ajanga ashiba agi, 2015-16 küm India-i shishilembaba US sen billion 641 nungi Pakistan-i India dang nungi shishilembabaji US sen billion 2.67 dang liasü.

Tawa kiralongrartemi Jammu & Kashmir nung Uri amakba sülen linük ana tesentaktep tamajungba küma India-i Pakistan den 1966 küm tezüngzüktep agiba- Indus Waters Treaty reprangshia telemtetba kar agiogo. Iba senden nung Ato kilonser, Modi-i, “Azü aser tzü na külemi ayimtsü makok,” ta jembi.

Yasüng ayaterm nung India-isa November ita nung Pakistan yimtiba, Islamabad nung ayonga aliba SAARC Summit nung madentsü telemtetba agiogo.