Tanü India-Pakistan army tsüngda senden amentsü

Jammu, September 20 (Agencies): Hombar nü Jammu & Kashmir, Poonch nung aliba Line of Control (LoC) nung India aser Pakistan na tsüngda army tem senden amentsü, aser iba senden nung arrtsülen yimjung alitsü atema jembitsü.
“Ceasefire alema inyakba onük nung India aser Pakistan na Brigade Commander level nung senden LoC, Chakan da Bagh crossing point nung amentsü,” ta PRO Defence Northern Command, Col S D Goswami-i ashi.
Tawa arrtsülen ceasefire temzüng kanga alema inyakba ajanga nübur asüba den külemi osettsüset kanga raksaogo aser tensa mesüngjemteti lir.
Linük anatsülen nungi field commander temi iba tensa süngjema akümtsü temelung nung yur jembitsü, ta paisa ashi.
Taküm September ita kija nung Pakistan sepaitemi ceasefire alema 23 ben tashi inyakogo. Iba mapang nung parnoki prangpong amshia 120 mm, 82 mm mortars, Rocket Projectile Grenades (RPGs) yokba den automatic prangpong amshiogo, ta India ketdangsertemi ashi.
Taoba Deobar nü Pakistan sepaitemi Rajouri district kübok LoC nung Manjakotr sector nung bomb yokdang BSF ketdangser ASI Sohan tepsetogo.