Tanü Inter-State Council senden alir

New Delhi, July 15 (Agencies): Honibarnü Ato kilonser, Narendra Modi-i ayonga Inter-State Council senden amentsü aser iba senden nung linük security, rongsenkettsüng, state tem tsüngda tesentaktep densema onük aika jembitsü.
Iba senden nung Chief Minister 31 prong adentsü imlar.
Küm 10 sülen tang Inter-State Council senden ya ayonger aser iba senden nung Modi den Union minister 17 adentsü.
Küm ana tejaklen Modi-i aniba Centre sorkar akümba sülen tang mezüng pai chief minister tem den sabang ka nungi jembitsü.
Kasa senden nung Centre-state tsüngda tesentaktep atema Punchhi Commission-i benokba onüktem jembitsü, maitsü atema Aadhaar card amshiba, subsidies atema Direct Benefit Transfer, tajangzüktem aser public services, school shisaliok jenjang ajungkettsü aser linük security onüktem jembitsü.
Iba senden nungsa Modi-i Goods & Services Tax Bill Parliament nung agizüktsü atema Chief minister tem dang nungitdaktsüner ta mepishitsü akok.
Tawa Jammu & Kashmir nung Hizbul Mujahideen telungpur, Burhan Wani kahsetba sülen nüburtemi longkak sashia aita tajemba agi nisung 36 tashi sür tensa mejungi aliba mapang ka nung iba senden ayongogo.
Taoba Inter-State Council senden 2006 küm mena liasü. UPA sorkar küm 10 yimsüsüba mapang nung iba senden anaben mena liasü.
Taoba küm Union Home Minister, Rajnath Singh mendenbuba ser zonal councils pongu senden mena liasü aser iba mapang nung peipei tesem nung Chief Minister temi shilem agia liasü.
Inter-State Council ya India Temzüng Arrla 263 kübok Tir tetuyuba nung 1990 küm May 28 nü tenteta liasü.
Iba tentet mapaji Union aser state tsüngda, state balala tsüngda amalitepa inyaktsü atema külem onüktem benoka o lemteptsü atema lir.
Inter-State Council atema Standing Committee ka tenteta lir aser parnoki benokba onüktemji Council nung süoka o lemteper.
Standing Committee nung mendenbubaji Union Home Minister lir aser züngsemtemji Inter-State Council mendenbubai Cabinet jenjang nungi Union minister pongu aser Chief minister tuku shimmer.
Home Minister, Rajnath Singh dak alia iba senden nung adentsüpur Inter-State Council züngsemtemji -External Affairs Union minister, Sushma Swaraj, Union Finance Minister, Arun Jaitley, Union Urban Development Minister, Venkaiah Naidu, Road & Transport Union Minister Nitin Gadkari aser Union Defence minister, Manohar Parrikar nunger lir.