Tanü Karbi Anglong mokdanger

Diphu, February 12 (Agencies): February 13, 2021 nü Convening Committee for Unification (CCU)-i ghonda 10 atema Karbi Anglong mokdangtsü ayongzükogo.
Hill Area Development (HAD) department aser Bodoland Territorial Region (BTR) ka küma lokteptsü ta asüba anema CCU-i iba mokdang ayonger.
Diphu nung aliba Karbi Anglong (DPCK) indang District Press Club nung osangbener den jembidang parnoki February 13 anepdang 5:00 ako nungi nikongdang 3:00 ako tashi mokdangtsüba osang metetdaktsü.
Iba sentong nung CCU lennirtem- Saising Rongpi, Kharsing Teron aser Rabindra Rongpi nunger liasü.
“Tenemlen alirtem aser district tem jenjang raksatsütsü atema yimtenren tasa ka atonga lir. Onoki ibaji magizüker aser anema noktaktsü” ta CCU lennir Kharsing Teron-i ashi.
“Assam nung kin telemsa ana lir- ka hills tribe aser ka plains tribe lir. Tenemlen aliba kintem aser lendenlen aliba kintem tsüngda tebendang tulu itta lir” ta Teron-isa metetdaktsü.
CCU telok nung president mesüra general secretary shima mali.
HAD aser BTR ka küma lokteptsübaji Indian Constitution of nung 6th Schedule anema lir ta Brihostibarnü Autonomous State Demand Committee (ASDC)-ia metetdaktsüogo.
Indian Constitution nung 6th Schedule ji plain area tem asoshi masü saka hill area tem ketdangsütsü atema lir, ta ASDC-i ashi.
Brihostibarnü chief minister Sarbananda Sonowal menden ser Assam Cabinet senden amendang Bodoland aser 6th Schedule Areas Administrative Staff College lapoktsü molunga agizük.