Tanü Khristan mera aser tanüdangtsü

– Talitemjen Imchen.

Tanü Khristan taküm kaji kodang noksa ka ama reprangdir jangratemtsüka aser jangramatemtsüka angur. 1872 Khristan yimsü aruba mapang tashi nung, tekong lu ayimtsü dang meteter liasü. Anepdang anüpongi alu aotsü aser nikongtsütsü alu nungi adoka kidang mejangtsü, mesüra karbo wadang tuluba inyaktsü asoshi alu nung ayiptsü ta lia aru. Alu ayimtsü dak alaka taküm alitsü asoshi rongsenkettsüng tsütsü tongtipang süa bushiba lenmang tanga maliasü. Par putu mapang nisung kati yim süngkümshi atener tanga limai aoba ji ajaki metetjema dang liasü. Iba ama tangatetba aser shisatsü lanu tensa ka nung Khristan yimsü milen tajungji bener arua tekong lima nungji amenok. Hopta ka nung tongtipang süa lokti sentepa külemtsü bodbar aonung, honibar aonung aser deobar anüngdang ta anogotemji atakteter, tekülemji agiyonga aru aser tanü tashi arudar.
Tanübo tamangba tsütsü dang masü, kaketshisatsü tashi nung tenük lapoker joko küm 138 meraa arur. Iba den yim kar nungbo joko tekong lu mayimer. Tekong lu ayimertemia joko tilala dang ayimer. Alulem, linok aser meritsüng melena machine tapu balala adokogo aser melenogo. Yongkokzüng melena rong noksa dener zülujang tapu balala nung nübur tsüngda amshiteper. Alimaji joko tashi agi masü tekolok agi inyakteper asünung, kar tali akar aser kar tali sensaker akümer. Kasaji kar mapa tali inyaktsüsa adoker aser kar inyaktsü mapa ajema mali akümer. Yamaji tanü putu nübur aika, ammang sangwa metitemi inyaker tepok masüngba mapang kati menüpa lir. Iba ama mazüngi inyaktepba putu ka nung, tanüa kasa akhi tekülem mapalem nung arogo arudar. Joko bodbar aonung aser honibar aonung tekülem sentep mapang sentepi aotsübo doktsür, aiben traffic jam nungi sentepi aortemji reprangtsüsa akümer. Bodbar aonung aser honibar aonung tekülem kidang netsüng sentepba ji asadangra, noklang shilem nung ter majongang senteper. Iba jagi tanü putu den joko nikongtsütsü sentep ya mapet akümer asü ta aiben shisadanger. Anung ji tekülem sentep mapang asoshi ABAM, NBCC aser tamanger tentet balalai tanü tensa den apet kar melenshitsü kanga junger ta nibo bilemer.
Kar dak alaka aikati nikongtsütsü tekülem sentepi maruteter asünung, deobar nü pei pei wadang nung sodi anguba den külemi temulung nung yongya atar tekülem senteper. Aika tsüngtsüng mako, mapang jilia apusobaji jangratemtsüka aser tekülem ki sünga senteper sentong agibaji ajak asoshi liromedema angazüker. Netsüng dang masü sentong yanglur aser tejembirtema tenük asünger.
Tekülem tom nung tambur, tantsür kar ajok mechir toktok ta mesüra teka mesüteper kimai tukoya angudang, ano meranga arungma no ta temulung sangwaa bilemer. Tanur tetsü kari kinü jepa ajonger tugoya angudang, tanurji kenübo lenir südakjangni ta kinü aser tetsü dang pelar. Saka tekülem nembanga tenüngsang agütsüba mapang, süoshi tasentem agir, tejak tepang labu naro ama tobur junger, tama tesü agi raktepa kimaleni tugotepa angudang, tobur tajungtemji raksatsür aser tekülem menentsür. Karibo medemsang aser medemla sarasademba mapang pei tugotsü lenmang aijang ta tapupang nung atepshir. Iba yimya ya nüburtemi memelenshili ta asünungbo, videographer jagiang joko noksaji tatemlenbo medangok tajungba. Saka nübur melenshibaji tajungtiba.
Sorkari gari nung NAME PLATE inoker amshitsü kar alaka ajakbo memelar. Aser name plate inokba temaitsü ji nüngtugo nisung mena lir ta sayunüba. Tang tashi sorkari molungtet tentet shinga name plate inoktsü melaa mali. Iba jagi tentet karibo tashi angaa name plate nung masü, zülu tulu agi gari nung item lokti indang ta zülur amshiteper. Saka temzüng alema tawa tanü lokti tentet timbaka nung tentet tenüng amer ketdangpurtemi gari nung name plate inoker amshiteper. Tesasatsükaji tanelar ozüng amer sannüker tashi agi iba ozüng ji alema amshir. Kodang temzüng nung aibelendir tepuokdak ayur mesüra takang/senchi achir asünung, sannükertem shirnoki name plate inoker gari jajadar, sorkari pua merenshidang ji santem samatsü ana nung lir. Sorkar ji asenok dang ajar asünung, name plateji lokti tentet lenir ajaki meima inoknürabang, amshitettsü temelaba temzüng yanglur külen dang amshitep nung kanga junger.

You must be logged in to post a comment Login