Tanü Lalu nem temerenshi obendang agütsütsü

New Delhi, January 05 (Agencies): Shiruru atema chiyungtsü senotsü nung ochimashiba ken o nung taoba mapang Bihar Chief Minister, Lalu Prasad aija pa nem temerenshi obendang Hokolbarnü agütsütsü liasü, ajisüaka iba obendangji Honibarnü nikongdang 2:00 ako nungang video conferencing ajanga agutsütsü, ta osang ka ajanga metetdaktsü.
Lalu densema iba ken o nung aitsür nisung pongu nem temerenshi agütsütsü atema tanü Ranchi Special CBI Court nung ken o angadanga liasü.
1990 aser 1994 küm tsüngda Bihar nung Deoghar district treasury nungi sen lakh 84.5 agizüka ochimeshii amshiba ken o nung December 23 nü CBI court-i Rashtriya Janata Dal (RJD) tongti, Lalu Prasad den tangar 15 aija liasü.
Iba dak sendakba nung Lalu indang lawyer-i, Lalu arishi küm nung ajemdaker pa nem temerenshi ajema agütsütsü imlar, ta shiogo.
“Lalu arishi küm 70 lir aser tashidak aika agi shiranger. Pa nem temerenshi ajema agütsütsü onoki imlar,” ta pai jembia liasü.
Lalu ya tang Ranchi nung aliba Birsa Munda Central Jail nung puoka lir.