Tanü Lanur Tia

– P. Renthy Jamir.

22nd September 1996 Changtongya Town Baptist Church youth Sangro toktepba nung azüngtsü parnoki asüngdangba ni ya zülu. Iba tensa Lanur noklang nung 75% mozülar anogoshi asür. Kelen Sensopur ola matoktettsüsa telok ana anüdoklen Myanmar anüdoktip Manipur nunger arua aremoka yur saru molok zünger mezüngma nübur tekep asar. Administration aser police officer ola matokteter. Ano NPSC ama nung question paper shishi ama yoktepa süpokrem agi Naga lima sayatenyar. Iba asükshi merongtsü tensa to bilemtettsü ya adoktsür. Iba den ano tanü tashi tansü maker lanur dang masü yimdak putu yimsüsür aika miim mozülar angur. Anungji yilar, mozülar jenti ngua iba tensa to ken bilemteta mulungzüreba ya lepshir.
I. Aya tongnüsen sentsü remogo, anü lur ita madoker.
Anüng naka tsüngpret den tesashi tsüngi ola metangoktsür.
Au, taitanütsüka tzüsem yipru arürer kong jenoktsü ta,
Parnok nela lular senti shisa temseter tanü lanurtem.
Amsü nung tsüker arenlung agi kitsünglung kümdakja tebenjemtem tia.
Süngyu kongpet medem senzüka toktsüogo tapayutsü sangpang Kongrolatem.
Senti berem jakrep nemjemaka lua marutet antokpeter miyongzüa aleptetego.
Shiba dak jeploktsü korangbang nung ozumi sükdang den saku,
Tesüneptsür mali tanguba zübo agi tarutsü nükdangtem ayako tendaktsür.

II. Tebenjemtem tia koda sütsüaka yimti yimdong nung oliorar süisüponger
Ajaki parnok angudang tephi, tephi ta metzü metsülokja ataker.
Atangji aria bilemtsü, melena yimsüsürtemi parnok maochi makongdisüa
Pei juli asüngtsü kitsük mipener ama reponga ariteper.
Auni, linük meimerata tetsü tosoli nüchiso bushira ta,
Lanurtem taküm süngku shinü agia memeyong seret modangi
Sentizü tokshija tenükshitsü tebenjemtem taküm jenti manglangtemtsür
Aser tamangtir putirtemi ar-ina oa parnok kümzüktsü
Tasü meitettsüsa met aiadoker rongsen azüaponga iba sülen asemjener.

III. Reprangangjo asen Lima tia angudang kotak tsüngrular kentenba anentsüsa
Lipok nungi bendena ayuba shitibener senpong ajak kinangseptsür
Kika Süpongchir jendang tsüknung Chireper langkoshishi amentaka lir.
Nübur auso nung mangrang apongtsüsa linük anüktsü ayuba mitkartem
Saku Semer yur nokinketer tasü peleter pokpapoklema asükshi merongseta,
Lapinaro anor anü meria pua yimti yimdong kinük kisang tasüng
Rakzükraktemer ashilongka kiralongrar agi mejaka ao majung kümdaktsüogo
Aser lendi nung tasümang ondaka angudang ozüng amerten den
Korangsemer tapubang tasüng petinu jeploker tezüi meria aor.

IV. Aiatai tia tano lanurtem tsüka alia memenemshitsüsa ajemoktsüogo
Yinti shita menden toktepdang temsüa alir bonglangi nemoktsür,
Süpokrem mayang südakja heplangpur temaba mendeni ajungketja mendaktsür
Koda asütsü tzü dak mi dak nok koda matong
Jepaka nüktzü malu taküm remta kümer shisa tatem,
Nüchiso Jongpu atsükoker rakzükraktemer telok nung oa pongsemer
Aser Linük saru molok zünger mezüngma purateta züindaktsür.
Aji oda azü dak azük nung ak dak angu medem
Süsang alettsü melen shitsük letdakja tai makar ayako tendaktsür

V. Auni asen Lima atakatem menameya tai makar zü tokshitsü,
Tetsüng tekara memeshiba ain yazü mangdang puraben jembiba
Yimsüsür Chuba menden raktepdang nübur tsüngda telemsa yanglutsüba
Teraksatem agi Tipu Lim tashi oa sayatenyadakja liaka,
Ya Lanur putu majung ta parnok teka aidoka
Tepenjemtem tiabo songtokra mangtsüngsong koktenra leptsüngmeki ta kümdaktsür.
Iba tia nunga lanurtemi asentenshir temulung tanga arutsü melena
Temokpet ama Halingali nem puwadaktsür sümanga oa aliba ya,
Tanü Lanur tia masü no ta nemjemseta senti shisa amsar.

VI. Hai, Lanurtem aramesoang Linük teraksa yanglushitsü azümesena melili.
Toktsüdi temang aser tanela anaprongla tepsetba temesepba machimajemtsü
Atsüshia melenshir tazüokba süngra kübok tashi angaa lidi.
Yimso yimosonger artain, süsüpur jilu yinshia nübur tsübudakja
Metsüngzübok tener tangari bendenba rongsen melangzüka mechireptsüli
Linük temzüng amzü takong agia memeyong aliba ya melena
Ochiba seret ozükdi alizung tongtettsü nükla tasen nung ranglokdi.
Atangji tai makar zü tokshija nübur maochi amokmerena reshikangshirbo
Teyangluri anojungi ajungmeshi mapang anü ludakja taküm manglangtemtsür.

VII. Anüdok, anüdoktip Sangchisangnu libuimpur sentsü nüloker ket nung
Asen Sobaliba tasüngtet yimten yimli takang jibenlangpensüa mamoktsüli.
Tarutsü lanur putu kümzüka ayutsü mechi anibülem aremdi,
Yimtsütentsüsa Yimjenpongjener anioka tsurabur yimli agi yapoyanü mesüli.
Asen temeden asoshi longjemshir masetshiba jenjang yimteter nokdakdi.
Ochi nangri kanger tanen maka merangjen meranga züsendi.
Tasü tait lanur meraket konang sobutsü nok nüji amer
Takotet Walunir kaka kümteta aseni bener aruba nüngo naroküm jagi
Asen yimli NANGZÜKBA LIMA ama yangerteta lanur tia yanglushidi.