Tanü lanurtemi putu tasen ka aginer

~ I. Zülu Pongen, Mongsenbai Ward, Mkg.

Tanü putu Democracy system nung yimsü asür asünungji lanur MLA aika adokdaki. Lanuri lanur lenir aginer joko tantsür tamburtem den shisa obang ka nung mulung majemteter, tejen yimya sübaba nung moteter mesüra memulunger, sürabang lanur MLA temi lanur putui aginüba ama bener otettsü koka lir mali mesüra mulunger asü masü?
Tanü lanurtemi aginübaji alima tejakleni onür tetezü terenlok aginer. Iba terenlok ya yim o yim tsüngda aser state o state tsüngta lenmang tajung akaba ajanga tang terenlok ya bener arutettsü. Terenlok mangdangji lenmang tajung akaba ajanga adoker. Temeshi Tsüngrem lar aika adokba aser alima tema-telong ajak seret odangtetba aser oset tasen aika yanglutetba scientist tem liaka yimsüsür tajung ochishir madok tashi terenlokji kodanga bener marutettsü. Lenmang tajungji meyanglutetra tashi temeteter aika liaka ajakji amajok aser alimai parnokji memetettsü.
Anungji yimsüsür lanur ochishir nüngdaker, lenmang junga lira aser alima tejakleni aniba mangdang kara asen lima factory, Industries, project aser company tajung aika bener arutettsü aser lanur tashir-mashir ajaki inyaktettsüsa mapa aika adoktsü, iba sülen alima pela alitsü. Saka tangbo lenmang tajung mali nungji shisa akartemi sen angulen tiyazü project dang bener aruteper. Lenmang tajung makasür terenlok sanction bener arurji terenlok atemer yimsüsüri anir commission secretary aser director tem yangko nung asemer paper nungbo sentong tajung indang sangdonger, saka alimabo anosa kasa alir kecha memelenshir.
Joko tanü lanu putui tejen yimsüsüba, tejen maparen, terenlok makaba yimsüsüsba ya maginer. Yimsüsür ochishia lira contractortemia ochishia inyaktsü, asenoki ochi meshira ajak ochi mashiba agi alima asüngtsü.
Foot hill road nung Doyang apolar shibai mapa inyaker, senbo 75% agizükogo ta asübaji shilem 4 nung asembo inyakba sayur, saka paper nungbo ano 100% nung 25-30% dang inyakba sayur, tanüngbaji mapa tuluba sen ishibaji, koda asütsü (?) saka ibaibo lenmangji toktsür Doyang apu atema dang lir, tanga lenmangtemjia koda (?) Iba lenmang ya nisung senzütsü yanglur asü contractor mapa angutsü atema yanglur (?) Tenemtsüng lenmang ya Ao lima atema dangbo masü, ibai Mon, Longleng, Tuensang, Zunheboto aser Mokokchung District tem atema tongtibang lenmang asünungji yimsüsür aser tulur ajaki mezüngbuba mapa ka ama bilema inyaktsüla.
Tanübo PDA sorkari bena alinungji nenoki election nung o agi masü mapa agi inyaka sayutsü ta nangzükba ama mapa agi medenjangni ta mepishia zülur.
Ano Old Age Pension-a kümbo süir saka tanü tashi mangur. Ano student tem ya ajak takar-tulur tangbo masü, anungji tilaba nungi university student tashi menua meli yakta scholarship agüjangma ta paper ajanga khuret lemsateper.