Tanü linük tatong Tir election agitsü aser osang sangdongtsü

New Delhi, August 04 (Agencies): August 5, 2017 nü Parliament nung India tatong Tir menden atema election agitsü, aser iba election nung BJP-i aniba NDA candidate, M Venkaiah Naidu-i takok angutsü ta asadangteta lir.
Honibarnü election agiba sülen kasa anogo nikongdangsa linük tatong Tir election osang sangdongtsü.
Lok Sabha nung NDA züngsemtem majority lir, anungji par candidate-i melamela takok angutsü.
Ano Congress-i aniba opposition-ia Naidu den toktepdaktsütsü atema Gopal Krishna Gandhi shim.
BJD aser JD(U)-i Tir election nung NDA candidate, Ramnath Kovind yaria liasü, ajisüaka tatong Tir election nungbo opposition candidate, Gandhi ang yaritsü, ta sangdongogo.
JD(U)-i Bihar nung ‘Mahagathbandhan’ teloktep nungi pilaa BJP den longjemer sorkar tasen kümogo, ajisüaka parnoki Congress-i aniba opposition candidate, Gandhi ang yaritsü ta sangdong.
Honibar anepdang 10:00 ako nungi nikongdang 5:00 ako tashi election agitsü, aser iba mapang nung Parliament züngsemtemi special pens amshia candidate shimtsü.
Election tembangba sülen vote azüngtsü aser aonung 7:00 ako nung election osang sangdongtsü, ta Election Commission ketdangsertemi metetdaktsü.
Tang teinyakdak tatong tir, Md Hamid Ansari-i anabenren tashi iba menden abenba sülen pa kümsük August 10, 2017 nü tembangtsü.
Electoral college-i tatong Tir shimteter, aser iba college nung Rajya Sabha aser Lok Sabha züngsemtem lir.
House ana senteper züngsem 790 lir, saka Lok Sabha nung menden tazüng ana aser Rajya Sabha nung menden tazüng ka lir.
Lok Sabha nung züngsem 545 nungi BJP züngsem 281 lir aser BJP-i aniba NDA züngsem 338 lir.
Ano züngsem 243 aliba Rajya Sabha nung BJP züngsem 56 lir aser iba House nungbo Congress single largest party (züngsem 59) lir.
Ajisüaka tawa assembly election nung takok anguba sülenbo Rajya Sabha nung BJP ya single largest party akumtsü.