Tanü linük tesem ajaklen opposition-i longkak aittsü

New Delhi, November 27 (Agencies): Narendra Modi-i aniba sorkari sen 500 aser 1,000 notes anentsüba anema Hombarnü linük tesem ajaklen longkak aittsü atema opposition party aika longjemogo.
Congress, Communist Party of India (Marxist), Samajwadi Party (SP), Trinamool Congress (TMC), Bahujan Samaj Party (BSP), All India Anna Dravida Munnetra Kazhagam (AIADMK) aser Dravida Munnetra Kazhagam (DMK)-i November 28 nü ‘Aakrosh Diwas’ longkak aittsü atema Bodhbarnü telemtetba agia liasü.
Opposition party balalai jembiba apibo, parnoki state yimtibatem aser district ajak nung aliba Central sorkar office ajak nung aser bank tem kima nung longkak aittsü.
Onük ka nung opposition party tem longjemaka longkak aitba yimyaji party sasep nung balala asütsü ta lemtetogo.
Opposition party temi Centre sorkar dang akhangba onüktem rongnung- mapang telatet ka tashi sen 500 aser 1,000 note amshia atatsü, sorkar telemtetba mesangdongdang telung nung osang prokba atema Joint Parliamentary Committee nem bushisüngdangdaktsütsü aser Parliament House anaprong nung iba onük nung o tokteptsü takhangba densema lir.
Ano, New Delhi nungisa tanga osang ka nung tanü Congress-i, Hombarnü parnoki ‘Bharat Bandh’ mayongzük saka linük tesem ajaklen longkak aittsü, ta metetdaktsü.
Delhi nung osangbeneretm den jembidang Congress lenir, Jairam Ramesh-i, General election mapang Ato kilonseri bendanglen nungi ‘black money’ bener arutsü nangzükba meinyaktetba ajanga ibaji nembangtsü atema Modi-i langka inyaknüa liasü, ta ashi.
Paisa, sen tamshidak anentsüba ajanga ochimashi lenmang ajanga sen jenti rizünga alirtem mekongshir saka ‘black money’ malirtem ang timtem ajurudar, ta ashi.
Modi’er sorkar aija Ramesh-i, November 9 nü nungi tenzüker linük shishilembabaren anenogo, ta ashi.