Tanü Lok Sabha elections anogotem sangdongtsü

New Delhi, March 15, 2024 (Agencies): March 15, 2024 nikongdang 3:00 ako nung 2024 Lok Sabha election atema anogotem metetdaktsütsü ta Election Commission of India (ECI)-i metetdaktsüogo.

Lok Sabha election den külemi state pezü nung Assembly election agitsüba anogotem asüng metetdaktsütsü ta ECI-isa ashi.

Election agitsü anogotem osang metetdaktsüba sülen Model Code of Conduct tenzüktsü. 2019 Lok Sabha election nung shilem tenet lemsar April 11 nungi May 19 tashi agia liasü aser anogo pezü lir results metetdaktsü.

Taküm April/May nung assembly election agitsüba state temji Arunachal Pradesh, Andhra Pradesh, Odisha, aser Sikkim lir.

Maneni taküm küm tatemlen Maharashtra, Haryana aser Jharkhand nunga assembly elections agitsü.

Ano, Supreme Court-ia Jammu and Kashmir aser Ladakh nung taküm September 30 matongdang Assembly election agitsü tetuyuba agüja lir.

Election Commissioner ana tasen shimokba sülen anogo ka lir ECI-i tanü Lok Sabha elections agitsüba anogotem sangdongtsü osang metetdaktsüogo.

Taküm February ita Anup Chandra Pandey kümsük agi tonger sodi anguba aser taoba hopta Arun Goel-i kanga dang ajungbena sodi agiba sülen yashi taoba IAS officer tem- Gyanesh Kumar aser Sukhbir Singh Sandhu na Election Commissioner inyaktsü shimogo.

Kumar aser Sandhu na shimba anema Association for Democratic Reforms-i ken o benokogo.

Supreme Court nung electoral bonds anema ken o benokertem rongnung ADR densema lir aser parnokisa Election Commissioner ana shimba sota atatsü asüngdangogo. Election Commissioner ana shimba luden nung Chief Justice DY Chandrachud medendaktsüba anema ADR-i iba ken o benoka liasü.

SC-i iba ken o ya March 21, 2024 nü angadangtsü metetdaktsüogo.

Prime Minister menden ser züngsem asem luden kati ashiba nung ajemaker President-i Election Commissioner shima arur. Iba luden nung Union Minister ka aser Lok Sabha nung Leader of the Opposition adener.

Ajisüaka, March 2023 nung Supreme Court-i iba luden nung Prime Minister, Leader of the Opposition aser Chief Justice adentsüla ta ashi saka SC-isa iba atema ozüng ka yanglutsüla ta shisem.

Yaküm December ita Centre sorkari inyakyim tasen ka atema ozüng ka yanglu aser iba nung Chief Justice melena Union Minister ka adentsü latet.