Tanü Mkg nung lokti senden akatsü

Mokokchung, Aami/June 14 (TYO): Loktiliba nung tetsürtem anema inyakba mapatem aser ozüng alema inyakba mapatem kanga bulua atalokba anema Rogonü (Hokolbar) anepdang 9:30 ako nungi Police Point, Mokokchung town nung lokti senden ka ayongzükogo.
‘Mokokchung Town Public Meeting on Crimes against women and social evils in the society’ nüngja nung ayongba senden ya Mokokchung jila aser Aoer lokti tongti tentettem- Mokokchung Town Aor Telongjem, All Ward Union Mokokchung, Mokokchung Town Lanur Telongjem, Ao Senden, Watsu Mungdang aser Ao Kaketshir Mungdang-i senpeter ayongzük.
Tawa, Aami/June 10, 2018 nü Mokokchung jila kübok Mongsenbai ward nung kanga tanur tetsür chanu ka dak tashiyim mapa inyakba den külemi loktiliba nung tetsürtem anema kanga bulua inyakba aser ozüng alema inyakba mapatem kanga bulua akumba ajanga iba senden ya ayongtsüsa akum, ta tanü Organizing Committee Convenor, Limanungsang aser Member Secretary, Longrangty Longchar nati sangdong ka ajanga metetdaktsü.
Iba dak sendakba nung Aoer lokti tentet tulutiba-Ao Senden-i Aami/June 13, 2018 nü senden ka ayongzüka liasü, aser iba senden nung Aoer lokti tentettemi iba onük nung o lemtepba sülen resolution cum organizing committee ka tentet.
Rogonü lokti senden aliba mapang nung shishilembaba dokan ajak shibangtsü. Iba senden takok ngua katettsü atema tentet balala nem mapa balala lemzüktsüogo.
Joint organizations-i shimba Organizing Committee-i iba senden nung Mokokchung jila nung alir tanur-tain, tetsür-tebur aser communities ajak medema adentsü jaoker, ta kasa sangdong ajanga metetdaktsü.