Tanü Modi-i NITI Aayog senden ayonga amentsü

New Delhi, July 27 (Agencies): Linük nung lenla ajak nung terenlok atema küm 15 vision document renemtsü asoshi Brihostibarnü Ato kilonser, Narendra Modi mendenbuba ser NITI Aayog senden amentsü.
“Iba senden nung NITI Aayog-i tang tashi nung vision document atema inyaka aliba presentation ka Ato kilonser nem agütsütsü,” ta sorkar ketdangser kati ashi.
NITI Aayog Mendenbuba Modi-isa rongsenkettsüng aser sorkar indang mapatong balala  reprangshitsü. Iba senden nung NITI Aayog tatong Mendenbuba, Arvind Panagariya den züngsemtem adentsü.
Iba dak alia sensak tia jenjang tajungba akümtsü atema inyaker aser aluyimba terenlok atema inyaker task force committee-ia report agütsütsü.
Committee anaprong ya yaküm February 8 nü mezüng NITI Aayog senden amendang tenteta liasü.
Ketdangserisa ashiba agi, vision document atema o lemteptsü asoshi NITI Aayog Governing Council senden matongdang Brihostibarnü senden ya jelia agir.
Ato kilonseri aniba Governing Council nung chief minister ajak aser home, finance, railway aser agriculture minister tem ji ex-officio züngsemtem lir.
Iba tenteti 2030 küm tashi atema vision document renemtsü.