Tanü Modi-i Saudi Arabia Chuba Salman Bin den senden amentsü

Riyadh, New Delhi, April 02 (Agencies): Tanü India Ato kilonser, Narendra Modi Riyadh yimti tonga aruogo aser pai anogo ananü Saudi Arabia semdangba mapang linük ana tesentaktep yangluba den külemi security aser kiralongraba anema raraba nung amalitepa inyaktsü atema jembitsü.
Iba mapang nung Modi aser Saudi lenirtem tsüngda kiralongraba ajanga amokmeren onük  tongtibangsüa jembitsü. Saudi ya Islam nunger atema temeshi lima ka ama züngshir. Kiralongrartem, talisa ISIS anema raratsü atema tawa yangi Muslim nunger linük 34 lungjema liasü.
Alima nung totzü jenti adokdaktsüba linük, Saudi Arabia den India tesentaktep lir.
Deobarnü Ato kilonser Modi-i Chuba Salman Bin Abdulaziz Al-Saud den tesentaktep onük aika nung o lemteptsü, iba sülen linük ana tsüngda tezüngzüktep ishika agitsü. Modi-isa Crown Prince aser interior minister, Mohammed bin Naif aser Deputy Crown Prince aser defence minister, Mohammed bin Salman na balala ajurua senden amentsü.
Küm trok tejaklen taoba Ato kilonser Manmohan Singh-i Saudi Arabia semdangba sülen nungi India aser Saudi na tsüngda security aser counter-terror cooperation nung tesentaktep tashi itshia liasü.
Saudi Arabia ya Pakistan den-a tesentaktep junga lir, aser Pakistan nung amenoka aliba kiralongrar teloktemi India nung kiralongraba atema Modi-i süoka jembitsüa akok.
Yaküm August ita nung Modi-i Pakistan den tesentaktep tajung aliba linük, United Arab Emirates (UAE) semdanga liasü, iba mapang nung India aser UAE napronglai külem sangdong ka ajanga, linük kati linük ka anema kiralongraba anentsü atema linüktem dang sangoktsü, aser iba osangji Pakistan nem agütsüba liasü.
Modi aser pa meina aoertem yimti tiyong nung aliba Majestic King Saudi Guest Palace nung anenzüka lir.
Saudi Arabia semdanger India nunger Ato kilonser pezübubaji Modi asütsü. Taoba Ato kilonsertem- Manmohan Singh-i 2010 küm semdang, Indira Gandhi-i 1982 küm semdang aser Jawaharlal Nehru-i 1956 küm iba linük semdanga liasü.